प्रॉपर्टी टैक्स जमा करे के तारीख बढ़िस, अब 30 अप्रैल के बाद लगही 17% सरचार्ज
Property Tax Chhattisgarh : रायपुर। छत्तीसगढ़ म प्रॉपर्टी टैक्स जमा करे वइया मन बर एक ठन बड़ राहत के खबर आय हे। सरकार ह टैक्स जमा करे के आखिरी तारीख ला बढ़ा के अब 30 अप्रैल कर दीस हे। प्रशासन कोति ले साफ कहि दे गे हे कि नवा तारीख के बाद टैक्स जमा करे म 17 प्रतिशत सरचार्ज (अतिरिक्त सुल्क) देना पड़ही, एखर सेती लोगन मन ले बखत म भुगतना करे के अपील करे गे हे।
target पूरा नइ होय के सेती बढ़िस समय बताय जावत हे कि राजस्व वसूली के जउन लक्ष्य रखे गे रहिस, ओ ह तय समय म पूरा नइ हो पाइस, जेखर सेती ए फैसला ले गे हे। राज्य के जतका भी नगरीय निकाय हें, ओ मन ला 30 दिन के अउ अतिरिक्त समय दे गे हे। ए निर्णय ले ओ करदाता मन ला राहत मिलही, जउन मन कोनो कारण ले अभी तक टैक्स जमा नइ कर पाय रहिन। अब ओ मन बिना कोनो एक्स्ट्रा पैसा दिए 30 अप्रैल तक भुगतना कर सकहीं। प्रशासन ह लोगन मन ले बिनती करे हे कि आखिरी तारीख के अगोरा झन करौ अउ सरचार्ज ले बचे बर पहिली ही अपन प्रॉपर्टी टैक्स जमा कर देव।
