प्राइवेट स्कूल मनमानी करत हें, एनएसयूआई ह चूड़ी अउ चश्मा धरके डीईओ आफिस घेर दीस
बिलासपुर। जिला म नियम के खिलाफ चलत प्राइवेट स्कूल मन के ऊपर कारवाही के मांग ला लेके एनएसयूआई ह मोर्चा खोल दे हे। एनएसयूआई ह एसएस पब्लिक स्कूल, केपीएस ब्रांच, अचीवर्स स्कूल मंगला के संग अउ दूसर नियम के खिलाफ चलत स्कूल मन के शिकायत करे रीहिस। ए बात ऊपर जांच अउ कारवाही के मांग करत एनएसयूआई के कार्यकर्ता मन चूड़ी अउ नजर के चश्मा धरके डीईओ (DEO) आफिस के घेराव कर दीन।
शिकायत के बाद घलो कारवाही नई होए के आरोप एनएसयूआई के नेता मन के कहना हे कि पहिली घलो स्कूल मन के गड़बड़ी ला लेके शिक्षा विभाग म शिकायत करे गे रीहिस, फेर अब तक न तो जांच रिपोर्ट सामने आईस अउ न ही कोनो कारवाही होईस। ओ मन आरोप लगाईन कि स्कूल वाले मन लइका अउ दाई-ददा मन ऊपर स्कूल परिसर से ही किताब, यूनिफॉर्म अउ दूसर सामान खरीदे के दबाव बनाथें। संग म प्राइवेट प्रकाशक मन के मंहगा किताब खरीदे बर घलो मजबूर करे जाथे।
ए आरोप घलो हे कि कतको स्कूल मन म नियम के खिलाफ 12 महीना के फीस पहिलीच वसूल करे जावत हे। एकर अलावा हर बछर टर्म फीस के नाम म अलग से पैसा ले जाथे, अउ फीस जमा करे म देरी होए ले रोज के 10 रुपिया के हिसाब से लेट फीस वसूले जावत हे।
शिकायत म एसएस पब्लिक स्कूल के बारे म ए घलो कहे गे हे कि ए स्कूल ह बिना खेल मैदान के चलत हे अउ भवन के एक हिस्सा ला किराया म दे दे गे हे। संग म मान्यता के शर्त अउ शिक्षा विभाग के नियम मन के उल्लंघन, दाई-ददा मन के आर्थिक सोसन अउ दूसर गड़बड़ी के आरोप घलो लगाए गे हे। एनएसयूआई ह शिक्षा विभाग से मांग करे हे कि सबो आरोप मन के निरपछ अउ बड़का जांच होना चईही।
