फसल बीमा कराए बर 31 जुलाई तक मौका, धान समेत 10 फसल मन मा योजना लागू
Pradhan Mantri Fasal Bima Yojana Chhattisgarh : गरियाबंद, 21 जुलाई 2026 : खरीफ फसल 2026 बर प्रधानमंत्री फसल बीमा योजना के तहत किसान मन 31 जुलाई तक अपन फसल के बीमा करा सकत हवयं। गरियाबंद कलेक्टर के अध्यक्षता मा 16 जुलाई के होए जिला स्तरीय बैठक मा अधिकारी मन ला ए योजना के जादा ले जादा प्रचार-प्रसार करे बर कहे गे हे।
बैठक मा बताए गिस कि छत्तीसगढ़ सरकार कोति ले खरीफ 2026 बर गरियाबंद जिला मा धान सिंचित, धान असिंचित, मक्का, उड़द, मूंग, अरहर, मूंगफली, कोदो, कुटकी अऊ रागी फसल मन ला शामिल करे गे हे। ए योजना के फायदा कर्जा लेए अऊ बिना कर्जा वाले किसान, भू-धारक, बटाईदार अऊ वनपट्टाधारी सबो किसान मन उठा सकत हवयं। जिला बर बीमा कंपनी के रूप मा ‘बजाज अलायंस जनरल इंश्योरेंस’ ला जिम्मेदारी दिए गे हे।
कतेक दे बर लागही प्रीमियम
कृषि विभाग के मुताबिक अनाज, दलहन अऊ तिलहन फसल मन बर कुल बीमित रकम के 2 प्रतिशत अऊ छोटे अनाज (लघुधान्य) फसल मन बर 1 प्रतिशत प्रीमियम किसान मन ला दे बर लागही।
धान सिंचित: 66 हजार रूपया के बीमित राशि मा 1320 रूपया प्रीमियम
धान असिंचित: 49.50 हजार रूपया मा 990 रूपया प्रीमियम
मक्का: 50.60 हजार रूपया मा 1012 रूपया प्रीमियम
अरहर: 46.20 हजार रूपया मा 1012 रूपया प्रीमियम
उड़द-मूंग: 27.50 हजार रूपया मा 550 रूपया प्रीमियम
मूंगफली: 51.70 हजार रूपया मा 1034 रूपया प्रीमियम
कोदो: 19.80 हजार रूपया मा 198 रूपया प्रीमियम
कुटकी: 20.90 हजार रूपया मा 209 रूपया प्रीमियम
रागी: 18.70 हजार रूपया मा 187 रूपया प्रीमियम
इहाँ करव आवेदन
जेन किसान कर्जा नइ ले हवयं, ओमन अपन आधार कार्ड, बैंक पासबुक, बी-1, पी-2 अऊ फसल बोए के प्रमाण पत्र के संग नजीक के सीएससी (CSC) सेंटर, बैंक या लोक सेवा केंद्र मा जाके बीमा करा सकत हवयं। फसल ला नुकसान होए मा 72 घंटा के भीतर ‘कृषि रक्षक पोर्टल’ या टोल फ्री हेल्पलाइन नंबर 14447 मा जानकारी दे बर लागही।
अधिकारी मन के कहना हे कि ए साल अल-नीनो के सेती पानी गिरे मा देरी या अनियमितता होए के शंका हे। एइसन मा नुकसान ले बचे बर सबो किसान मन आखिरी तारीख 31 जुलाई ले पहिली बीमा जरूर करा लेवयं।
