बिजली बिल के छुट्टी… छत म लगाव सोलर, खरचा उठावत हे सरकार!

PM Surya Ghar Yojana : हर महीना बिजली के भारी-भरकम बिल ले हलाकान मनखे मन बर केंद्र सरकार ह एक बड़े राहत के खबर लाए हवय। ‘पीएम सूर्य घर: मुफ्त बिजली योजना’ के तहत अब आप मन अपन छत म सोलर पैनल लगवा के बिजली बिल ल जीरो कर सकथव। ए योजना म सरकार ह 78 हजार रूपिया तक के सब्सिडी (छूट) देवत हवय।

सब्सिडी के पूरा गणित समझव
ए योजना के सबसे बढ़िया बात ये हे कि सरकार ह सीधा आप मन के बैंक खाता म पैसा भेजही।

अगर आप मन 1 किलोवाट के पैनल लगवाथव त 30,000 रूपिया के मदद मिलही।

2 किलोवाट म 60,000 रूपिया सरकार कोति ले मिलही।

अगर 3 किलोवाट या ओकर ले बड़े सिस्टम लगवाथव, त आप मन ल अधिकतम 78,000 रूपिया के छूट मिलही।

बैंक ऑफ बड़ौदा ले मिलही सस्ता लोन
बाकी बचे खरचा बर आप मन ल चिंता करे के जरूरत नई हे। बैंक ऑफ बड़ौदा ह सिरिफ 5.75% ब्याज दर म 2 लाख रूपिया तक के लोन देवत हवय। ए लोन बर न कोनो गारंटी के जरूरत हे अउ न ही इनकम प्रूफ (सैलरी स्लिप) के। ए लोन ल आप मन 10 साल म पटा सकथव।

लोन बर का-का चाही?
लोन बर ऑनलाइन आवेदन करे जा सकत हे, जेमा सिरिफ 15-20 मिनट लगथे। एकर बर कुछ शर्त हवय:

उम्र 21 साल ले जादा होना चाही।

अपन खुद के छत होना चाही अउ बिजली कनेक्शन आप मन के नाम म हो।

सिबिल (CIBIL) स्कोर 680 या ओकर ले जादा होना चाही।

कागज म सिरिफ आधार कार्ड, मोबाइल नंबर, बिजली बिल अउ सोलर वेंडर के कोटेशन चाही।

नेट-मीटरिंग के घलो फायदा
ए योजना म ‘नेट-मीटरिंग’ के घलो सुविधा हे। मतलब अगर आप मन के सोलर पैनल जरूरत ले जादा बिजली बनाथे, त आप मन ओला वापस बिजली विभाग ल बेच सकथव। एकर ले आप मन के बिल म क्रेडिट जुड़ जाही अउ खरचा अउ कम हो जाही।

अगर आप मन घलो ए मौका के फायदा उठाना चाहत हव, त pmsuryaghar.gov.in म जाके अपन रजिस्ट्रेशन करा सकथव।