डिप्टी सीएम ह मुख्यमंत्री ल लिखिन चिट्ठी: सौंपिन पीएम आवास के परफॉर्मेंस रिपोर्ट
PM Awas Yojana Chhattisgarh : रायपुर। छत्तीसगढ़ के उपमुख्यमंत्री अउ पंचायत व ग्रामीण विकास मंत्री विजय शर्मा ह मुख्यमंत्री विष्णुदेव साय ल एक ठन चिट्ठी लिख के प्रधानमंत्री आवास योजना (ग्रामीण) के परफॉर्मेंस रिपोर्ट सौंपे हें। चिट्ठी म वोहा दावा करिन कि सरकार बने के बाद ले परदेस म गरीब मन ल पक्का घर देये के वादा ल पहिली पंगत म पूरा करे गिस अउ पिछला ढाई बछर म रिकॉर्ड संख्या म मकान मन के निरमाण कराये गे हे।
भूपेश सरकार ऊपर साधिन निसाना: चिट्ठी म विजय शर्मा ह कहिन कि पहिली के भूपेश सरकार के बखत प्रधानमंत्री आवास योजना बर जरूरी रकम (रासि) नहीं दिये गिस। जेकर सेती लाखन गरीब परवार मन पक्का मकान ले वंचित रह गे रहिन। वोहा कहिन कि एही मुददा ल लेके “मोर आवास-मोर अधिकार” जन आंदोलन चले रहिस अउ बीजेपी ह सरकार बने के बाद पहिली कैबिनेट म ही गरीब मन ल आवास देये के संकलप ले रीहिस।
पीएम आवास ऊपर पूरा ध्यान: वोहा लिखिन कि 14 दिसंबर 2023 के हुये पहिली कैबिनेट बइठक म जम्मो अदूरा मकान, बछर 2011 के स्थायी प्रतीक्षा सूची के बचे हितग्राही, आवास प्लस सूची अउ मुख्यमंत्री आवास योजना (ग्रामीण आवास न्याय योजना) के हितग्राही मन ल मिला के कुल 18 लाख 12 हजार 742 आवास मन ल पूरा करे के संकलप लिये गिस। इसके अलावा पीएम जनमन अउ नक्सल प्रभावित इलाका मन बर बिसेस परियोजना के तहत घलो हजारन अउ नवा आवास मंजूर करे गिस।
मोर आवास, मोर अभियान: उपमुख्यमंत्री ह चिट्ठी म कहिन कि हमर सरकार ह 26,908 करोड़ रुपिया के रासि देके गरीब मन के पक्का मकान के सपना ल पूरा करे बर ठोस कदम उठाइस। वोहा दावा करिन कि सरकार बने के बाद “मोर आवास-मोर अधिकार” अभियान ल बड़ सफलता मिलिस अउ परदेस म ढाई बछर के भितरी 10.60 लाख ले जादा आवास मन ल पूरा करे जा चुके हे।
हर दिन बनत हे 2000 मकान: चिट्ठी म ए बात के घलो जिकर हे कि अप्रैल ले अक्टूबर 2025 के बीच छत्तीसगढ़ म हर दिन करीब 2,000 आवास पूरे करे गिस, जबकि अभी के बखत म हर दिन 4,600 ले जादा आवास पूरे करे जात हें। बछर 2025-26 म राज्य म 6 लाख ले जादा आवास पूरा होये के घलो दावा करे गे हे।
विजय शर्मा ह ए घलो बताइन कि सरकार ह सिर्फ अपन चुनावी वादा मन ल ही पूरा नहीं करिस, बल्कि पिछली सरकार के मुख्यमंत्री आवास योजना के हितग्राही मन के बचे हुये रासि ल घलो जारी करिस। वोहा माइलोगन स्व-सहायता समूह मन के भूमिका के सरहाना करत कहिन कि “डीलर दीदी” अउ “रानी मिस्त्री” जइसन योजना ले हजारन माइलोगन मन आर्थिक रूप ले मजबूत हुईं अउ कतको झन “लखपति दीदी” बने म सफल होइन। चिट्ठी के आखिरी म वोहा “आवास प्लस 2.0-2024” सर्वे के घलो जिकर करिन अउ कहिन कि जिन गरीब परवार मन करा अभी घलो कच्छा मकान हे, ओ मन के सरवे अउ आगे के काम ल तेजी से बढ़ाय जात हे।
