भूपेश-बैज के ‘जोहार’ ले बड़े निकलिस फूलोदेवी के ‘सोनिया सेवा’; राज्यसभा टिकट ऊपर भाजपा के धमाकेदार पोस्टर वार!
BJP vs Congress : रायपुर | 7 मार्च 2026: छत्तीसगढ़ के सियासी अखाड़ा में राज्यसभा चुनाव ला लेके घमासान मच गे हे। भाजपा ह एक अइसन पोस्टर जारी करे हे, जेखर ले कांग्रेस के भीतर खलबली मच गे हे। ये पोस्टर में राज्यसभा प्रत्याशी चयन ला लेके सीधा तंज कसे गे हे कि कांग्रेस में मेहनत नई, बल्कि ‘गांधी परिवार के सेवा’ के आधार ऊपर टिकट मिलथे।
का हे पोस्टर में?
भाजपा के जारी करे ये पोस्टर में पूर्व मुख्यमंत्री भूपेश बघेल अउ कांग्रेस अध्यक्ष दीपक बैज ला राहुल गांधी अउ प्रियंका गांधी के आगू हाथ जोड़े खड़े दिखाए गे हे।
सेवा बनाम गुहार: पोस्टर में दिखाए गे हे कि जहाँ भूपेश बघेल अपन बेटा बर अउ दीपक बैज अपन खुद बर टिकट मांगत हें, उहाँ प्रियंका गांधी ह कहत हे कि फूलोदेवी ह सोनिया गांधी के सेवा में जी-जान लगा दे रहीस, एही पाय के ओला टिकट मिले हे।
गुलाब के फूल: पोस्टर में लिखाय हे कि ‘गुलाब के फूल बिछाके स्वागत करे के बाद घलो, भूपेश अउ दीपक बैज ऊपर फूलोदेवी के सोनिया सेवा भारी पड़ गे।’
अजय चंद्राकर के चुटकी
ये मामला में भाजपा के कद्दावर नेता अजय चंद्राकर ह घलो अपन अंदाज में गोठियाईन। ओ मन कहिन—
“विषय ये नई हे कि ककर चलिस अउ ककर नई। पिछली बार जउन तीन झन राज्यसभा सांसद बनके आय रहिन, ओ मन ला त कोनो पहचानत घलो नई रहिन। कम से कम फूलोदेवी ला लोगन मन जानत त हें।”
बाकी मुद्दा मन ऊपर घलो बरसे चंद्राकर
शराब अउ बोनस: होली में रिकॉर्ड शराब के बिक्री ऊपर चंद्राकर ह कहिन कि सरकार ह धान के बोनस पहिली दे दे रहीस, अब मनखे मन ओला शराब में उड़ा दे हें त सरकार का करही? ये त सामाजिक बुराई आय।
धान खरीदी: धान के बोरा में पानी डाले के मामला में भूपेश बघेल के बयान ला ओ मन गलत बताईन अउ कहिन कि ओ मन ला ए मुद्दा में बोले के कोनो नैतिक अधिकार नई हे।
अफीम के खेती: दुर्ग में भाजपा नेता के खेत में अफीम मिले के गोठ ऊपर ओ मन कहिन कि जउन गलत हे, वो गलत हे। चाहे वो भाजपा के होवय या कांग्रेस के, कानून अपन काम करही।
