रायपुर रेलवे स्टेशन म यात्री ले लूट: बदमाश मन ह चाकू मार के घायल करीन, नगदी अउ मोबाइल लूट के फरार
रायपुर, 27 जनवरी 2026/ राजधानी के रायपुर रेलवे स्टेशन म ट्रेन के अगोरा करत एक यात्री के संग मारपीट अउ लूटपाट के घटना होय हे। अज्ञात बदमाश मन ह युवक ऊपर चाकू ले हमला करके ओला लहूलुहान कर दीन अउ नगद पइसा समेत मोबाइल लूट के फरार हो गे हें।
जानकारी के मुताबिक, रायपुर के नहरपारा निवासी गजालुद्दीन ह नागपुर जाय बर रेलवे स्टेशन के प्लेटफॉर्म म खड़े रहीस। ओ बखत कुछ अज्ञात युवक मन ओखर तीर पहुँचीं अउ विवाद करे लागिन। देखते ही देखते विवाद ह मारपीट म बदल गे अउ बदमाश मन ह चाकू ले गजालुद्दीन के मुड़ (सिर) म वार कर दीन। हमला के बाद आरोपी मन ह ओखर ले 8 हजार रुपया नगद अउ मोबाइल लूट के भाग गे हें।
घायल युवक ल अस्पताल म भर्ती कराए गे हे। ताज्जुब के बात ये हे कि एतकी बड़े घटना के बाद घलो जीआरपी पुलिस ह अब तक ले कोनो एफआईआर दर्ज नई करे हे। स्टेशन जइसन सुरक्षित जगह म अइसन हमला ले यात्री मन म डर के माहौल हे।
