Pandit Pradeep Mishra Katha Durg : दुर्ग मा उमड़ही आस्था के सैलाब : पंडित प्रदीप मिश्रा के शिव महापुराण कथा, जानव कब ले होवत हे सुरू
Pandit Pradeep Mishra Katha Durg : दुर्ग, छत्तीसगढ़: हमर छत्तीसगढ़ के दुर्ग जिला के ग्राम नगपुरा मा काली, 17 दिसंबर ले आस्था के बड़े सैलाब उमड़े बर जावत हे। देश के बड़े कथा वाचक पंडित प्रदीप मिश्रा (सीहोर वाले) के श्रीमुख ले शिव महापुराण कथा के भव्य सुभारंभ होही। ए धार्मिक आयोजन मा सामिल होय बर पूरा राज ले लाखों सरधालु मन के आवे के उमीद हे। एतका बड़े भीड़ ल देखत हुए दुर्ग पुलिस ह कमर कस ले हे अउ यातायात ल सुधारे बर कड़ा नियम जारी करे हे।
Pandit Pradeep Mishra Katha Durg : कलि ले बदल जाही रद्दा: बड़े गाड़ी मन के ‘नो-एंट्री’
आयोजन के बखत आम जनता अउ भक्त मन ल जाम मा झन फँसना परय, एखर बर दुर्ग पुलिस ह विशेष ‘रूट चार्ट’ बनाए हे। काल्हु बिहनिया ले ही कथा स्थल कोति जाय वाले बड़े गाड़ी मन (ट्रक अउ टिप्पर) के आना-जाना बंद रही। पुलिस के मुताबिक, गनियारी-बोरई रद्दा ले आवे वाला भारी गाड़ी मन ल बोरई, घुमका अउ ठेलका डीह कोति मोड़ दे जाही। वइसने चिखली चौक अउ धमधा रोड कोति ले नगपुरा डहर कोनो भी बड़े गाड़ी ल जाय के इजाजत नइ होही।
भक्त मन बर गाड़ी खड़ा करे के बेवस्था (पार्किंग)
बाहर ले आवे वाला सरधालु मन के गाड़ी मन बर पुलिस ह अलग-अलग जगह मा पार्किंग बनाए हे:
रायपुर, भिलाई अउ दुर्ग डहर ले आवे वाला भक्त मन अपन गाड़ी ल बाजार चौक के बिजली सब स्टेशन करा पार्क करही।
अंजोरा अउ गनियारी कोति ले आवे वाला मन बर नगपुरा पुलिस चौकी के बाजू वाले मैदान मा पार्किंग बनाए गे हे।
खैरागढ़ अउ धमधा रद्दा ले आवे वाला गाड़ी मन ल नगपुरा चौकी के पहिली ही बने पार्किंग मा रोकना होही।
तैयारी पूरा, नगपुरा हो गे हे शिवमय
पंडित प्रदीप मिश्रा के कथा ल लेके नगपुरा मा जम्मो तैयारी पूरा हो गे हे। पंडाल ले लेके सुरक्षा बर सैकड़ों सेवादार (वालंटियर्स) तैनात करे गे हें। प्रशासन ह भक्त मन ले बिनती करे हे कि ओ मन पुलिस के बताए रद्दा मा ही चलंय अउ भीड़ ले बचे बर समे के पहिली कथा स्थल पहुँच जायं। काल्हु ले शुरू होवइया ए आयोजन ह पूरा जिला मा भक्ति के माहौल बना दे हे।
