बस्तर के ‘बड़ी दीदी’ बुधरी ताती अउ दंतेवाड़ा के गोडबोले दंपत्ति ला पद्मश्री सम्मान, सीएम साय ह दीन बधाई
Padma Shri 2026 : रायपुर। छत्तीसगढ़ बर ये ह बहुते गौरव के बात ए कि केंद्र सरकार ह साल 2026 बर राज्य के तीन झन मनखे मन ला पद्मश्री सम्मान दे के घोसना करे हे। समाज सेवा बर बस्तर के ‘बड़ी दीदी’ बुधरी ताती अउ बेमिसल डाक्टरी सेवा बर दंतेवाड़ा के गोडबोले दंपत्ति ला पद्मश्री पुरस्कार ले नवाजे जाही। मुख्यमंत्री विष्णुदेव साय ह ए तीनों झन ला बधाई देवत किहिन कि ए मन अपन सेवा अउ मिहनत ले छत्तीसगढ़ के मान ला पूरा देस म बढ़ाए हें।
बस्तर के दुरिहा अंचल म रह के काम करइया ए विभूति मन ला गणतंत्र दिवस के पहिली सांझ ये सम्मान मिले के खबर आइस, जेखर ले पूरा परदेश म खुसी के माहौल हे।
सम्मान पाएइया मन के बारे म जानव:
बस्तर के ‘बड़ी दीदी’ बुधरी ताती: दंतेवाड़ा के हीरानार गांव म रहइया बुधरी ताती ह साल 1984 ले आदिवासी मन के उत्थान बर काम करत हे। ओ मन ह नशामुक्ति, साक्षरता अउ माइलोगन मन ला आत्मनिर्भर बनाए म जुटे हें। अभी तक 500 ले जादा महिला मन ला ओ मन ह रोजगार ले जोड़े हें। लोगन मन ओ मन ला मया ले ‘बड़ी दीदी’ कहिथें।
डॉक्टर गोडबोले दंपत्ति: दंतेवाड़ा म चिकित्सा सेवा देवइया डॉ. रामचंद्र त्रयम्बक गोडबोले अउ ओखर धर्मपत्नी सुनीता गोडबोले ला संयुक्त रूप ले पद्मश्री सम्मान मिले हे। ए दंपत्ति ह पिछले 37 साल ले बस्तर अउ अबूझमाड़ के ओ दुरिहा गांव मन म जाके मुफत म इलाज करत हें, जिहां आज घलो बिजली अउ सड़क नइ पहुंच पाए हे।
ए सम्मान मिलना छत्तीसगढ़ के सेवा भावना अउ सामाजिक प्रतिबद्धता ला राष्ट्रीय स्तर म पहचान दिलाइस हे। ये ह बस्तर अंचल बर गौरव के बात ए।
