नेपाल मं बाढ़ ले भारी तबाही, 133 भारतीय लापता, छत्तीसगढ़ सरकार जारी करिस हेल्पलाइन नंबर
Nepal Flood : रायपुर। नेपाल के रसुवा जिला मं 26 अगस्त के तड़के भोटेकोशी नदी मं अचानक बाढ़ आ गे। तेज सैलाब ले भारी तबाही मच गे हे। बाढ़ के पानी मं सैकड़ों मकान, गाड़ी, पुल अउ सड़क बह गे। बाढ़ एतका तेजी ले आई कि लोगन ला संभलके निकलई के मौका तक नइ मिल पाइस। नेपाल मं बाढ़ अउ भूस्खलन के बीच छत्तीसगढ़ के कई नागरिक फंसे बताए जा रहे हें। एखर मदद बर राज्य सरकार हेलीपलाइन नंबर जारी करिस हे।
छत्तीसगढ़ सरकार जारी करिस हेल्पलाइन
नेपाल मं फंसे छत्तीसगढ़ के नागरिक या उनके परिवार वाले मदद अउ जरूरी जानकारी बर आपदा प्रबंधन हेल्पलाइन 1070 मं संपर्क कर सकत हें। एकर अलावा +91-771-2223471 नंबर मं भी जानकारी ले सकत हें।
मुख्यमंत्री विष्णु देव साय कहिन कि संकट के ए घड़ी मं छत्तीसगढ़ सरकार अपन हर नागरिक के संग खड़े हे। नेपाल मं फंसे नागरिक मन के सुरक्षित वापसी अउ जरूरी सहायता बर सरकार पूरी तरह ले जुटे हे।
सीएम साय जताइन दुख
मुख्यमंत्री विष्णु देव साय नेपाल मं आए भीषण बाढ़ अउ भूस्खलन ले हुए जनहानि पर गहरा दुख जताइन। उहां भगवान पशुपतिनाथ ले दिवंगत आत्मा मन के शांति बर प्रार्थना करिन। साथे शोक मं डूबे परिवार मन ला दुख सहन करे के शक्ति मिले अउ लापता लोगन के सकुशल वापसी होय, एखर बर भी प्रार्थना करिन।
भारतीय दूतावास भी जारी करिस इमरजेंसी नंबर
नेपाल मं अचानक आए बाढ़ ले प्रभावित भारतीय नागरिक मन के मदद बर भारतीय दूतावास भी इमरजेंसी हेल्पलाइन नंबर जारी करिस हे। जरूरत पड़ने पर +977 985 131 6807 अउ +977 970 910 7500 नंबर मं संपर्क करे जा सकथे।
133 भारतीय लापता बताए जा रहे
जानकारी के मुताबिक नेपाल मं बाढ़ अउ भूस्खलन के चलते 160 ले जियादा लोगन के मौत हो चुके हे, जबकि 1000 ले जियादा लोग लापता बताए जा रहे हें। एमा 59 कैलास मानसरोवर यात्री समेत कुल 133 भारतीय नागरिक के लापता होय के जानकारी सामने आए हे।
भोटेकोशी नदी मं अचानक आए बाढ़ ले रसुवा जिला मं हालात गंभीर हो गे हें। राहत अउ बचाव दल प्रभावित इलाका मं राहत काम मं जुटे हें। छत्तीसगढ़ सरकार भी नेपाल मं फंसे अपन नागरिक मन के जानकारी जुटाए अउ उनकर सुरक्षित वापसी बर लगातार प्रयास करत हे।
