नकटी मा गरीब मन के मकान टूट गे, तभो ले आइस बिजली बिल
Nakti Raipur news : रायपुर। ग्राम नकटी के प्रभावित गरीब परिवार मन के सिर ले छत पहिलिये छीन ले गे हे, अउ आज उही परिवार मन ला बिजली बिल थमा के प्रशासन ओमन के घाव मा नमक छिड़के के काम करत हे। ई खाली प्रशासनिक लापरवाही नोहे, बल्कि गरीब मन के संग अमानवीय अउ असंवेदनशील व्यवहार के उदाहरन हे।
प्रदेश कांग्रेस कमेटी (ओबीसी विभाग) के कार्यकारी प्रदेश अध्यक्ष भावेश बघेल किहिन कि जून महीना मा प्रशासन हा नकटी के कई ठन गरीब परिवार मन के मकान ला ढहा दीस। कतोक परिवार आज घलो खुला आसमान के नीचे या अस्थायी व्यवस्था मा रहे बर मजबूर हवयं। अइसन मा जुलाई महीना के बिजली बिल उही टूटे अउ उजड़े मकान मन के नाम मा जारी कर देना ई साबित करत हे कि प्रशासन ला न तो गरीब मन के पीरा के अहसास हे अउ न ओमन के अभी के हाल-चाल के कोनो चिंता हे।
ओमन किहिन कि जब कोनो परिवार के घरच नी बांचे हे, बिजली कनेक्शन के उपयोगच नी होवत हे, तब आखिर कोन आधार मा बिजली बिल भेजे गे हे? यदि ई तकनीकी गड़बड़ी (गलती) हे त ओला तुरंत सुधारे जाय अउ यदि जानबूझ के करे गे हे त ई प्रभावित परिवार मन ला मानसिक रूप ले परेशान करे के कोसिस हे।
भावेश बघेल हा किहिन कि नकटी के गरीब परिवार पहिलिये ले अपन घर-दुआर, रोजी-रोटी अउ सम्मान के लड़ाई लड़त हवयं। ओकर बाद घलो ओमन ला लगातार नवा-नवा तरीका ले परेशान करना बहुत दुर्भाग्यपूर्ण हे। सरकार अउ प्रशासन के जिम्मेदारी पीड़ित मन ला राहत अउ न्याय देना हे, न कि ओमन ला लगातार डर अउ परेशानी के माहौल मा जिये बर मजबूर करना।
भावेश बघेल हा राज्य सरकार अउ प्रशासन ले मांग करे हवयं कि नकटी के प्रभावित परिवार मन ला जारी करे गे बिजली बिल ला तुरंत रद्द करे जाय। सियान-जऊआन महिला मन के निजता ले जुड़े मामला के निष्पक्ष अउ जल्दी जांच करके दोषी मन ऊपर कड़ी कार्रवाई करे जाय अउ प्रभावित परिवार मन के हर तरह के उत्पीड़न ला तुरंत बंद करे जाय।
