MARVEL AI System : UPSC करिस, IPS बनिस अऊ फेर AI के जादूगर, भारत म सुरू होगे AI पुलिसिंग…जानव खासियत

MARVEL AI System : महाराष्ट्र  | महाराष्ट्र के सिंधुदुर्ग ज़िला ह देस म नवा ईतिहास रचत, प्रशासन अऊ सार्वजनिक सुरक्षा म आर्टिफिशियल इंटेलिजेंस (AI) ल लागू करे वाला पहिली ज़िला बन गे हवय। ज़िला के आठ ठन बड़े बिभाग मन म AI सिस्टम के काम-काज सुरू हो गे हवय। ए पहल ले प्रशासनिक काम मन म तेज़ी, पारदर्शिता अऊ दछता (efficiency) बाढ़े के आसा हे। एला ‘AI मॉनिटर्ड’ बनाए के जस्सा 2013 बैच के IPS अफसर हर्ष ए. पोद्दार ल जाथे, जऊन ह अभी नागपुर ग्रामीण के पुलिस अधीक्षक (SP) हवय।

MARVEL AI System : ‘MARVEL’ AI सिस्टम के कमाल

पोद्दार ह ‘MARVEL’ नाँव के AI सिस्टम बनाए हे। ए सिस्टम ह:

• भीड़ म हथियार मन ल पहिचान लेथे।

• मनखे मन के गिनती करथे।

• खतरा के अंदाजा लगा लेथे।

एकर से पुलिस ल कोनो आतंकी हमला, भगदड़ या बड़े हादसा के पहिली ले ही स्तिथि ल समझे अऊ तइयारी करे म मदद मिलथे। MARVEL के कारन ही सिंधुदुर्ग ज़िला ल देस के पहिली ‘AI डिस्ट्रिक्ट’ के रूप म जाने जा सकिस।

 पढ़ाई-लिखाई अऊ बिदेस म काम

हर्ष ह कोलकाता के नेशनल यूनिवर्सिटी ऑफ ज्यूरिडिकल साइंसेज ले वकालत (Law) करिन।

ओकर बाद ओला यूनाइटेड किंगडम सरकार के शेवनिंग (Chevening) स्कॉलरशिप मिलिस।

ओ ह ऑक्सफोर्ड यूनिवर्सिटी ले इंटरनेशनल ऐंड कॉन्स्टीट्यूशनल लॉ म मास्टर्स (LLM) करिन।

फेर हार्वर्ड यूनिवर्सिटी के हार्वर्ड केनेडी स्कूल ले पब्लिक एडमिनिस्ट्रेशन म मास्टर्स करिन।

एकर बाद ओला ब्रिटेन के बड़का लॉ फर्म क्लिफर्ड कंपनी म कॉर्पोरेट वकील के नौकरी मिलिस। ओ ह लगभग 2 साल तक काम घलो करिन, फेर ओला ओ काम म मज़ा नई आवत रहिस।

यूपीएससी सिविल सर्विस के रद्दा

एकर सेती, साल 2011 म ओ ह भारत लहुट आइन। ओकर सपना रहिस के, ज़मीन ले जुड़ के समाज म बदलाव ला सकय।

एकर बर ओ ह यूनियन पब्लिक सर्विस कमीशन (UPSC) सिविल सर्विस ल चुनिन। पहिली पइरी म ओकर चयन होइस, फेर ओला इंडियन रेवेन्यूज सर्विस (IRS) मिलिस।

फेर, हर्ष ह साल 2013 म दुबारा UPSC के परीक्षा दिस अऊ ए पइरी 361वाँ रैंक पाइस। ओला इंडियन पुलिस सर्विस (IPS) मिलिस अऊ महाराष्ट्र कैडर म नौकरी करिन।