रायपुर के रामकृष्ण अस्पताल में बड़का हादसा : सेप्टिक टैंक साफ करे बर उतरे 3 झन सफाई कामगार मन के मौत, परिजन मन ह मचाइन हंगामा
Raipur News : रायपुर: राजधानी रायपुर के पचपेड़ी नाका स्थित रामकृष्ण अस्पताल में मंगलवार के रात एक बड़ दुखद घटना हो गे। अस्पताल के सिवरेज टैंक (सेप्टिक टैंक) के सफाई करे बर उतरे तीन झन मजदूर मन के जहरीली गैस के चपेट में आये ले मौत हो गे। ये घटना के बाद अस्पताल परिसर में भारी तनाव के माहौल बन गे हे।
जहरीली गैस बनिस काल मिले जानकारी के मुताबिक, सिमरन सिटी के रहने वाला गोविंद सेंद्रे, अनमोल मचकन अउ प्रशांत कुमार ह अस्पताल के टैंक सफ़ाई करे बर उतरे रहिन। टैंक के भीतर भरे जहरीली गैस के सेती एक-एक करके तीनों के हालत बिगड़ गे अउ मौका में ही ओ मन दम तोड़ दिन। जैसे ही ये खबर बाहिर आइस, हड़कंप मच गे।
अस्पताल के गेट में पुलिस ले झूमाझटकी अपन मनखे मन के मौत के खबर सुन के परिजन मन अस्पताल पहुंचिन अउ प्रबंधन के खिलाफ मोर्चा खोल दिन। गुस्साए परिजन अउ भीड़ ह अस्पताल के भीतर घुसे के कोशिश करिन, जेखर सेती पुलिस अउ लोगन मन के बीच जमकर झूमाझटकी अउ धक्का-मुक्की घलो होइस। रोत-कलपत परिजन मन के आरोप हे कि अस्पताल प्रबंधन ह पइसा बचाय के चक्कर में बिना कोनो सुरक्षा साधन (Safety Kit) के मजदूर मन ला टैंक में उतार दिस।
नियम मन के अनदेखी के आरोप परिजन मन के कहना हे कि सेप्टिक टैंक के सफाई बर आधुनिक मशीन अउ ऑक्सीजन मास्क कस जरूरी समान होना चाहिये, लेकिन अस्पताल ह नियम मन के धज्जी उड़ावत सीधा मजदूर मन ला मौत के मुंह में ढकेल दिस। अब पीड़ित परिवार ह दोषी मन ऊपर सख्त कार्रवाई अउ न्याय के मांग करत हें। पुलिस ह मामला दर्ज करके जांच शुरू कर दे हे, लेकिन अभी घलो अस्पताल में भारी पुलिस बल तैनात हे अउ माहौल तनावपूर्ण बने हुए हे।
