महतारी वंदन योजना म बड़े अपडेट: 30 जून तक ई-केवायसी नई कराए म रुक सकत हे पइसा!
कांकेर। महतारी वंदन योजना के फायदा लेवइया महिला मन बर एक बड़े खबर आगू आइस हे। छतीसगढ़ सरकार डहर ले अलर्ट जारी करत किहे गे हे कि जेकर ई-केवायसी (e-KYC) नई होही, ओकर पैसा रुक सकत हे।
महतारी वंदन योजना के बड़े अपडेट
कांकेर जिला म महतारी वंदन योजना के तहत अब्बड़ मन महिला मन ल हर महीना रूपिया मिलत हे। जिला म करीबन 1 लाख 80 हजार महिला मन ल ए योजना के लाभ मिलत हे, जेम ले 1.72 लाख ले जादा नोनी-बऊमन के ई-केवायसी पूरा हो चुके हे। बस 8 हजार महिला मन के सत्यापन अभी बाकि हे।
महिला अउ बाल विकास विभाग डहर ले किहे गे हे कि जिन मन के ई-केवायसी अभी तक नई होय हे, ओ मन के नांव के सूची आंगनबाड़ी केंद्र मन म भेज दे गे हे। आंगनबाड़ी कार्यकर्ता मन ह महतारी वंदन ऐप के माध्यम ले अइसन महिला मन ल जानकारी देवत हें।
30 जून तक होही मुफ्त म ई-केवायसी
विभाग ह साफ किहे हे कि महिला मन अपन नगच के कॉमन सर्विस सेंटर (CSC) या ग्राम पंचायत म जाके 30 जून 2026 तक बिलकुल मुफ्त म अपन ई-केवायसी करवा सकत हें। एकर बर कोनो किसम के पइसा देय के जरूरत नई हे।
अधिकारी मन के कहना हे कि ई-केवायसी के मतलब असली हितग्राही मन के पहचान करना ए, ताकि योजना के पइसा सही मनखे तक पहुंच सके। अगर तय समय म ई-केवायसी नई होई, त आघू के किश्त मिले म दिक्कत आ सकत हे। विभाग ह सबो महिला मन ले अपील करे हे कि आखिरी तारीख के अगोरा झन करव अउ तुंहरते अपन ई-केवायसी पूरा करवा लव, ताकि महतारी वंदन योजना के पइसा हर महीना बिना कोनो रुकावट के मिलत रहे।
