महादेव सट्टा एप के प्रमोटर सौरभ चंद्राकर के 1700 करोड़ के संपत्ति जप्त: दुबई के बुर्ज खलीफा म घलो खरीदे रिहिस विला अऊ अपार्टमेंट
Mahadev App Scam : रायपुर। महादेव ऑनलाइन सट्टा एप के मामला म प्रवर्तन निदेशालय (ED) ह एक बड़े कार्यवाही करे हे। मुख्य प्रमोटर सौरभ चंद्राकर के भारत अऊ विदेश म स्थित लगभग 1700 करोड़ रूपिया के संपत्ति ला जब्त (अटैच) कर ले गे हे। ED ह मनी लॉन्ड्रिंग एक्ट (PMLA) के तहत ये आदेश जारी करे हे।
बुर्ज खलीफा म घलो रिहिस फ्लैट
जब्त करे गये संपत्ति म दुबई (UAE) के 18 अचल संपत्ति अऊ दिल्ली के 2 संपत्ति शामिल हें। दुबई म सौरभ चंद्राकर ह सट्टा के पइसा ले बुर्ज खलीफा जइसन नामी बिल्डिंग म अपार्टमेंट खरीदे रहिस। एकर अलावा दुबई हिल्स एस्टेट, फेयरवे रेजिडेंसी अऊ कई ठन लक्जरी विला घलो ओखर अऊ ओखर साथी मन के नाम म दर्ज रिहिस।
कइसे चलत रिहिस काला खेल?
ED के जांच म पता चलिस हे कि सौरभ चंद्राकर अऊ रवि उप्पल ह दुबई म बइठ के ये अंतरराष्ट्रीय सिंडिकेट ला चलावत रहिन। सट्टा ले होय कमाई ला ‘म्यूल्स’ (बिचौलिया) मन के फर्जी बैंक खाता अऊ हवाला के जरिए विदेश भेजे जात रहिस। ए पइसा ला फिर क्रिप्टोकरेंसी अऊ कीमती जमीन-जायदाद म निवेश करे जात रिहिस।
अब तक के बड़े कार्यवाही
संपत्ति: अब तक कुल 4336 करोड़ रूपिया के चल-अचल संपत्ति कुर्क करे जा चुके हे।
गिरफ्तारी: ए मामला म अब तक 13 झन ला गिरफ्तार करे गे हे।
भगोड़ा: सौरभ चंद्राकर, रवि उप्पल अऊ शुभम सोनी जइसन आरोपी मन ला ‘भगोड़ा आर्थिक अपराधी’ घोषित करे बर कोर्ट म अर्जी लगाय गे हे।
ED ह छत्तीसगढ़, आंध्र प्रदेश अऊ पश्चिम बंगाल म दर्ज FIR के आधार म ये जांच करत हे। रायपुर जोनल ऑफिस डहर ले ये साफ कर दे गे हे कि अवैध सट्टा ले कमाय एक-एक पइसा के पता लगाय जाही।
