शराब घोटाला : ED के महा-खुलासा, 29,800 पन्ना के चार्जशीट म 81 झन आरोपी; विदेश तक पहुंचिस घोटाले के पइसा

रायपुर: छत्तीसगढ़ के बहुचर्चित 3200 करोड़ के शराब घोटाला म प्रवर्तन निदेशालय (ED) ह स्पेशल कोर्ट म अपन आखिरी रिपोर्ट (फाइनल चार्जशीट) जमा कर दीस हे। 29 हजार 800 पन्ना के ये बड़े दस्तावेज म ED ह कुल 81 झन ला आरोपी बनाय हे, जेमा 59 नवा चेहरा सामिल हें। कोर्ट म रिपोर्ट पेश होय के बाद अब उमन ऊपर गिरफ्तारी के खतरा बढ़ गे हे, जेमन अभी बाहर हें।

विदेस म निवेश अऊ ‘सिंडिकेट’ के जाल
ED ह अपन रिपोर्ट म बड़े दावा करे हे कि ए घोटाला ला एक बड़े ‘संगठित गिरोह’ के सहीं अंजाम दे गे रहीस। ए भ्रष्टाचार के काली कमाई ला सिर्फ छत्तीसगढ़ म नई, बल्कि दुबई, नीदरलैंड अऊ लंदन सहीं देस मन म लगाय गे हे। बड़े अधिकारी मन ह अपन रिस्तेदार मन के नाव म विदेस म करोड़ों के संपत्ति खरीदे हें।

बड़े-बड़े दिग्गज मन के नाव
जांच एजेंसी के मुताबिक, ए पूरा खेल के पीछे एक ‘सिंडिकेट’ (गुट) काम करत रहीस, जेमा अनवर ढेबर, अरुणपति त्रिपाठी, अनिल टुटेजा अऊ सौम्या चौरसिया सहीं नाव सामिल हें। ए मन ह अपन मनपसंद अधिकारी मन ला जिला मन म पोस्टिंग करवा के पूरा घोटाला ला अंजाम दीं। ED ह पूर्व मुख्यमंत्री के बेटा चैतन्य बघेल उर्फ बिट्टू ला घलो ए सिंडिकेट म साझीदार बताय हे।

ये मन घलो बनिन आरोपी
नवा चार्जशीट म यश टुटेजा, लक्ष्मीनारायण बंसल अऊ कतको शराब कारोबारी संग आबकारी विभाग के अधिकारी मन के नाव हे। संग म छत्तीसगढ़ डिस्टलरी अऊ ढेबर बिल्डकॉन सहीं कंपनी मन ला घलो आरोपी बनाय गे हे।

अब का होही?
सुप्रीम कोर्ट के आदेश के बाद समय म दाखिल ए चार्जशीट म डिजिटल सबूत अऊ बैंक के लेन-देन के पूरा जानकारी दे गे हे। अब कोर्ट म सुनवाई (ट्रायल) शुरू होही, जेकर बाद आरोपी मन के सजा तय करे जाही।