Korba Triple Murder : करोड़पति बने के चक्कर म 3 झन जान गवा दिस, अंधबिसवास आय या फेर चालबाजी?
Korba Triple Murder : कोरबा, छत्तीसगढ़। पइसा के अंधा लालच अऊ अंधबिसवास के भयंकर मिलन ह कोरबा शहर ल हिला डारे हे। स्क्रैप के ब्यपारी अशरफ मेमन समेत तीन मनखे मन के लाश ओकर फार्महाउस म संदिग्धा हालत म मिले हे। ए सनसनीखेज घटना ओ बखत होईस, जब ओ मन रातोरात ‘करोड़पति’ बने के लालसा म एक ‘बैगा’ ले तंत्र पूजा करवात रहिन।
Korba Triple Murder : अढ़ाई करोड़ के लालच म 3 जिनगी खतम
पुलिस के कहना हे कि, मरे वाला मन म ब्यपारी अशरफ मेमन, कोरबा के एक जवान अऊ बिलासपुर के एक अऊ मनखे सामिल हे। ए पूरा मामला के जड़ म हे कथित ‘बैगा’ राजेंद्र कुमार, जे ह तीनों ल धोखा दे रिहिस। राजेंद्र ह कहि रिहिस कि ₹5 लाख देहू त, वो तंत्र क्रिया ले ओ मन ल ₹2.5 करोड़ के धन बना के देही। एही करोड़पति बने के सपना ह तीनों ल मौत के घाट उतार दिस।
बंद कमरा के भयानक सच्चाई
काल रात बरबसपुर स्थित फार्महाउस के बाड़ी म ए तांत्रिक क्रिया सुरु होईस। बैगा राजेंद्र कुमार ह एक-एक करके अशरफ मेमन अऊ बाकी दू झन ल पूजा खातिर बंद कमरा म बूलाइस, नींबू दिस, अऊ 15 ले 30 मिनट खातिर अंदर बंद कर दिस।
बैगा के संगी अश्विनी कुर्रे ह बताइस, “जब कपाट ल खोलिन त, तीनों मरे पर रेहिन।”
ए साधारन मौत नोहे, बल्कि तीन झन के हत्या दिखत हे।
पुलिस के सुरुवाती अंदेशा: ‘जहर देके मारिन’
घटना के बाद पुलिस ह फौरन एक्शन लेवत बैगा राजेंद्र कुमार समेत तीन आरोपी मन ल धर के पूछ्ताछ सुरु कर देहे। पुलिस ल शंका हे कि तीनों पीड़ित मन ल तांत्रिक पूजा के नाम म जहर देके मारे गेहे।
मरे वाला: स्क्रैप ब्यपारी अशरफ मेमन अऊ दू अऊ झन।
आरोपी/संदेही: बैगा राजेंद्र कुमार समेत तीन मनखे।
मकसद: पइसा के अंधा लालच अऊ तंत्र-मंत्र के नाटक।
फिलहाल, पुलिस ह लाश मन ल पोस्टमार्टम बर भेज देहे अऊ मर्ग कायम कर लेहे। ए घटना ह पूरा सहर म सनसनी अऊ डर के माहौल पैदा कर देहे, जे ह ए सोचे बर मजबूर करत हे कि का ए अंधबिसवास म भुलईस एक हादसा हे, या फेर ₹2.5 करोड़ के लालच म रचे गेहे एक खूनी चालबाजी?
