Korba News : रेलवे के नोटिस ले हड़कंप : 250 परिवार मन के घर छिने के डर, सड़क म उतरीन मइनखे, मांगिन मुआवजा अउ ठउर
Korba News : कोरबा: ऊर्जाधानी कोरबा के इंदिरा नगर बस्ती मा रहइया 250 परिवार मन ऊपर आज बेघर होय के खतरा मंडरावत हे। रेलवे ह घर खाली करे के नोटिस का जारी करिस, बस्ती के मनखे मन के नींद उड़ गे। जब रेलवे के अधिकारी मन सोमवार के घर-घर मा ‘लाल निशान’ लगाय बर पहुँचीं, त लोगन मन के गुस्सा फूट पड़िस। अपन घर बचाए बर मंगलवार के बिहनिया ले ही सैकड़ों मइनखे, जेमां माई-लोगन मन के संख्या जादा रहीस, सहर के मुख्य चौक (पवन टॉकिज फाटक) मा धरना मा बइठ गे हें।
Korba News : लाल निशान’ देख के डरे हें बस्ती वाले
बस्ती के मनखे मन के कहना हे कि ओ मन कतको बछर ले इहाँ रहत हें, फेर अब रेलवे ह अचानक घर खाली करे बर कहत हे। सोमवार के जब अधिकारी मन पुलिस के संग पहुँच के घर मन मा निशान लगाइन, त ओखर विरोध मा लोगन मन स्टेशन मा घलो प्रदर्शन करीन। प्रदर्शनकारी मन के साफ मांग हे कि जब तक ओ मन ल रहे बर कोनो दूसर जगह (विस्थापन) अउ उचित मुआवजा नइ मिल जाही, तब तक ओ मन अपन घर नइ छोड़ें।
अधिकारी मन के भरोसा के बाद खुलिस चक्काजाम
सहर के बीचों-बीच धरना देय ले चारों कोति गाड़ी मन के लाम लग गे रहीस। मउका मा पहुँचे नायब तहसीलदार दीपक पटेल ह प्रदर्शनकारी मन ले ज्ञापन लीस अउ भरोसा दिलाइस कि अभी कोनो घलो घर ल नइ तोड़े जाही। तहसीलदार ह कहिस कि रेलवे ल कोनो भी कार्रवाई करे के पहिली जिला प्रशासन ल सूचना देना जरूरी होही। वार्ड पार्षद तामेश अग्रवाल ह कहिस कि अभी प्रशासन के बात मान के धरना ल खत्म करे गे हे, फेर अगर मांग पूरा नइ होइस त आने वाला दिन मा कलेक्ट्रेट के घेराव करे जाही।
बिना ठउर के घर नइ छोड़बो
बस्ती वाले मन के साफ कहना हे कि ओ मन विकास के विरोधी नइ हें, फेर बिना कोनो वैकल्पिक व्यवस्था के ओ मन ल सड़क मा लाना सरासर गलत हे। अब देखना होही कि रेलवे अउ जिला प्रशासन मिल के ए 250 परिवार मन बर का फैसला लेथे।
Related Posts
