चकित करे वाला मामला: महिला ह नाबालिग ल बनाइस हवस के सिकार….
Kawardha Crime News : कवर्धा। कबीरधाम जिला म एक सनसनीखेज अउ चकित करे वाला मामला आगू आए हे, जिहां एक महिला ऊपर एक नाबालिग लइका के संग अनाचार करे के आरोप लगे हे। मामला के सिकायत के बाद पुलिस ह आरोपी महिला के खिलाफ पॉक्सो एक्ट (POCSO Act) के तहत अपराध दरज करके ओला गिरफ्तार कर ले हे। ए पूरा मामला सिटी कोतवाली कबीरधाम इलाका के आय।
लइका के सिकायत के मुताबिक, सोशल मीडिया के माध्यम ले ओकर परिचय एक महिला ले होईस, जेकर बाद गोठ-बात अउ मुलाकात के सिलसिला सुरू होईस अउ दोंस्ती हो गे। 1 अप्रैल 2026 के आरोपी महिला ह नाबालिग ल भोरमदेव रोड म स्थित भुनेश्वर होटल म बुलाइस, जिहां ओला भावनात्मक दबाव अउ मानसिक लालच देके ओकर संग गलत काम करिस। घटना के बाद आरोपी ह लइका ल डराइस-धमकाइस, जेकर सेती वो ह घबरा गे राहिस अउ तुरंत रिपोर्ट दर्ज नहीं करा पाइस।
पुलिस ह त्वरित कारवाही करत भेजीस जेल बाद म जब लइका ह हिम्मत जुटाइस अउ थाना म जाके रिपोर्ट दरज कराइस, त कबीरधाम पुलिस ह बिना कोनो देरी करे मामला के जांच सुरू कर दीस। मामला म फुरती देखात हुए पुलिस ह आरोपी महिला ल गिरफ्तार कर ले हे अउ ओला न्यायिक रिमांड म जेल भेजे के तैयारी करे जावत हे। पुलिस ह बताए हे कि नाबालिग मन के सुरक्षा ल धियान म रखत हुए पोक्सो अधिनियम के तहत सख्त वैधानिक कारवाही करे जाही।
