Kanker Violence Update : कांकेर म धर्मांतरण ला लेके भारी बवाल : गृहमंत्री विजय शर्मा बोलिन- अब आही अउ कड़ा कानून
Kanker Violence Update : रायपुर/कांकेर: छत्तीसगढ़ के कांकेर जिला के आमाबेड़ा (बड़े तेवड़ा) गांव म धर्मांतरण ला लेके जउन भारी विवाद अउ मारपीट होय हे, ओला लेके गृहमंत्री विजय शर्मा ह बड़े बयान दे हें। गृहमंत्री ह कहिन कि समाज के एक बड़े हिस्सा म ए बात ला लेके भारी गुस्सा हे कि लोगन मन ला भरमा के ओखर धरम ला बदलवा दे जाथे। एखर सेती समाज म दरार पैदा होवत हे। ओमन साफ कहिन कि सरकार ‘धरम स्वतंत्रता अधिनियम’ म बड़े बदलाव अउ संसोधन करके नवा कानून लाही, ताकि जबरदस्ती धर्मांतरण ला रोके जा सके।
Kanker Violence Update : कांकेर के बड़े तेवड़ा गांव म विवाद तब सुरु होइस जब एक धर्मांतरित मनखे के लास ला दफनाय बर ले गे रहिन। गाँव वाले मन एखर विरोध करीन अउ देखते-देखते भीड़ ह चर्च अउ सरपंच के घर म तोड़फोड़ कर दीस। ए हिंसक झड़प म आदिवासी अउ ईसाई समाज के लोगन मन आमने-सामने आ गीन। बीच-बचाव करे बर पहुँचे अंतागढ़ के एडिशनल एसपी (ASP) आशीष बंसोड़ ह घलो घायल हो गे हें। पुलिस ला स्थिति संभाले बर लाठीचार्ज घलो करे बर परिस। फिलहाल प्रशासन ह उहाँ ले लास ला निकाल के बाहिर भेज दे हे अउ अभी गाँव म स्थिति थोरिक सांत हे।
विपक्ष के आरोप मन के जवाब देवत विजय शर्मा ह कहिन कि कांग्रेस ला नारायणपुर के घटना घलो याद होना चाही। ए समाज के चिंता के विषय आय, ए म राजनीति नई होना चाही। ओमन कहिन कि बिल ला अभी रोके गे हे ताकि ओला अउ सुधारे जा सके अउ कड़ा बनाय जा सके। गृहमंत्री ह साफ सब्द म कहिन कि छत्तीसगढ़ म धर्मांतरण बंद होना चाही।
नसा के खिलाफ कार्रवाई ला लेके गृहमंत्री ह बताइन कि नवा साल ले पहिली पुलिस ह कम्मर कस ले हे। राजधानी म 80 लाख के कोकीन पकड़े गे हे। अब पुलिस ह नसा के ‘एंड टू एंड’ जांच करिही, मतलब नसा बेचे वाला ले लेके ओला खरीदे वाला अउ सप्लाई करे वाला, सबो झन जेल जाही।
कांग्रेस के ‘टैलेंट हंट’ (प्रवक्ता खोजे के कार्यक्रम) ऊपर तंज कसत विजय शर्मा ह कहिन कि राजनीति ह एक साधना आय। भाजपा म लोगन मन मेहनत करके आगू बढ़थें, इहाँ इटली ले आके कोनो ला अचानक अध्यक्ष नई बनाय जाय। ओमन कहिन कि कांग्रेस कोनो ला घलो प्रवक्ता बना ले, ओमन भाजपा के अनुभवी कार्यकर्ता मन के आगू टिक नई पाहीं।
