56 ग्राम पंचायत के सरपंच मन दीन सामूहिक इस्तीफा: विकास के काम नइ मिले ले हें नाराज, प्रशासन में हड़कंप
Chhattisgarh News : कांकेर। पाछू एक बछर (साल) ले ग्राम पंचायत मन में कोनो घलो किसम के विकास के काम नइ मिले ले नाराज कांकेर जिला के अंतागढ़ विकासखंड के जम्मो 56 ग्राम पंचायत के सरपंच मन ह एसडीएम (SDM) आफिस पहुंच के एक संग सामूहिक इस्तीफा सौंप दीन।
सरपंच मन ह प्रशासन ऊपर अरोप लगावत कहिन कि बीते एक साल ले पंचायत मन में कोनो नवा विकास के काम ला मंजूरी नइ मिले हे, जेकर सेती गांव मन में मूलभूत सुविधा से जुड़े जम्मो काम मन पूरी तरह ले ठप पड़े हे। पंचायत प्रतिनिधि मन के कहना हे कि बार-बार मांग करे अउ चिट्ठी लिखे के बाद घलो प्रशासन डहर ले एकर बर कोनो ठोस कदम नइ उठाए गिस।
गांव वाले मन हें नाराज, जवाब देना होगे रहीस मुसकिल
सरपंच मन ह कहिन कि पंचायत मन में विकास के काम नइ होए के सेती गांव के लोगन मन घलो भारी नाराज हें अउ जनप्रतिनिधि मन ला ओमन ला जवाब देना मुसकिल होगे रहीस। इही बात के विरोध करत सबो 56 ग्राम पंचायत के सरपंच मन ह एकमुठ (एकजुट) हो के सामूहिक इस्तीफा देवे के फैसला करिन।
इस्तीफा सौंपे के संग च सरपंच मन ह प्रशासन ले मांग करे हें कि पंचायत मन में जल्दी ले जल्दी विकास के काम मन ला मंजूरी दे जाए अउ जतका घलो रुके हुए योजना हे ओला सुरू करवाए जाए। दूसर कोती, एक संग 56 सरपंच मन के इस्तीफा देवे के घटना के बाद ले प्रशासनिक हलका में भारी हड़कंप मच गे हे।
