Kanan Pendari Zoo : कानन पेंडारी जू मा सोक के लहर: 22 साल के बाघिन ‘रागिनी’ ह दुनिया ल कहिस अलविदा…
Kanan Pendari Zoo : बिलासपुर | बिलासपुर के कानन पेंडारी जू ले एक ठन दुखद खबर आगू आए हे। चिड़ियाघर के सबसे सियान अउ जम्मो मनखे मन के चहेती बाघिन ‘रागिनी’ ह अब ए दुनिया ल छोड़ के चले गे हे। 22 साल के उम्र मा रागिनी ह दम तोड़ दीस। आप मन ल बता दन कि रागिनी ह साल 2018 मा रायपुर के नंदन वन ले एक्सचेंज प्रोग्राम के तहत बिलासपुर लाए गे रही। ओखर पहिली ओला असम के काजीरंगा नेशनल पार्क ले रेस्क्यू करे गे रही, जहाँ एक समय मा रागिनी अउ ओखर साथी मन के भारी खौफ रिहिस हे।
Kanan Pendari Zoo : रागिनी ह अपन उम्र के आखिरी पड़ाव मा रही, जेखर सेती ओला पिछले 7 साल ले जू के अस्पताल परिसर मा डॉक्टर मन के देखरेख मा रखे गे रही। जब ओला रायपुर ले बिलासपुर लाए गे रही, तब जांच मा पता चलीस कि ओखर के-नाइन (शिकारी दांत) नइ हे। एही कारण रिहिस कि रागिनी ह कच्चा मांस नइ खा पावत रही, ओखर बर रोज 5 ले 6 किलो बारीक कीमा बना के दे जात रही। डॉक्टर मन के मेहनत अउ विशेष सेवा के सेती ही रागिनी ह एतका लंबा समय (22 साल) तक जी पाइस।
read more : CG Sahkari Bank : छग के जिला सहकारी बैंक मन मा नवा अध्यक्ष-उपाध्यक्ष के नियुक्ति: 5 बैंक ल मिलिस नवा मुखिया
डॉक्टर मन के मुताबिक, रागिनी ह ऑस्टियोपोरोसिस नाम के बीमारी ले घलो जूझत रही, जेमा हड्डी मन कमजोर हो जाथे। ओखर मौत के बाद पशु डॉक्टर मन के टीम ह पोस्टमार्टम करीस, जेखर बखत जू प्रशासन अउ नेचर क्लब बिलासपुर के सदस्य मन घलो मौजूद रिहिन। पोस्टमार्टम के बाद रागिनी ल नम आंखी ले अंतिम विदाई दे गे। रागिनी के जाना कानन पेंडारी जू अउ वन्यजीव प्रेमी मन बर एक बड़े नुकसान आय।
कानन पेंडारी बर साल 2025 ह अच्छा नइ रहीस हे, काबर कि रागिनी ले पहिली घलो जू ह अपन दू ठन बड़े सदस्य मन ल खो चुके हे। 5 मार्च 2025 के शेर भीम के मौत होय रही अउ ओखर बाद 21 अप्रैल 2025 के बाघ आकाश ह घलो बीमारी के सेती दम तोड़ दे रहीस। लगातार होवइया ए मौत मन ले जू प्रशासन अउ बिलासपुर के लोगन मन मा भारी दुख के माहौल हे।
