ट्रैफिक जाम ले लोगन मन ला मिलही राहत, आज खुलही कचना ओवरब्रिज, CM साय करिहें लोकार्पण
CG NEWS : रायपुर. राजधानी रायपुर के रहइया मन ला ट्रैफिक जाम ले बड़े राहत मिले वाला हे। कचना ओवरब्रिज में सुकरवार (आज) ले लोगन मन के आना-जाना सुरू हो जाही। मुख्यमंत्री विष्णुदेव साय संझा कुन ये ओवरब्रिज के लोकार्पण करिहें। ये मौका में उप मुख्यमंत्री अरुण साव घलो संग में रहिहें। पीडब्ल्यूडी (PWD) के अधिकारी मन के कहना हे कि कचना ओवरब्रिज ला बनाए में करीब 49 करोड़ रुपिया के खरच आइस हे। ये ब्रिज के सुरू होए ले ये रद्दा के यातायात ह व्यवस्थित अउ तेज हो जाही।
सरकार डहर ले मार्च 2022 में 48.78 करोड़ रुपिया के मंजूरी दे गे रहीस। अउ काम सुरू करे के आदेस सितंबर 2023 में मिले रहीस। कागज के हिसाब से ओवरब्रिज के काम ला 18 महीना के भीतर पूरा करना रहीस। लेकिन रेलवे पटरी के ऊपर स्लैब, गर्डर लगाए अउ एकर ड्राइंग-डिजाइन ला रेलवे डहर ले समे पर मंजूरी नहीं मिलिस, जेकर सेती काम में थोरिक देरी हो गे। खैर, लंबा इंतजार के बाद अब ओवरब्रिज बनके पूरा तैयार हो गे हे।
जाम ले मिलही छुटकारा
दिनभर संकरनगर-खम्हारडीह रद्दा में लोगन मन के भारी भीड़ रहिथे। ओही च डहर रायपुर-वाल्टेयर रेललाइन होए के सेती जम्मो बेर ट्रेन मन के आना-जाना लगे रहिथे। जेकर कारण कइ पइत कचना रेलवे फाटक ला बंद करना पड़ जावत रहीस। अब ओवरब्रिज सुरू होए ले रँगेइया (राहगीर) मन ला जाम के झंझट ले मुक्ति मिल जाही।
संझा 5 ले रात 8 बजे तक रद्दा बदलगे, देखके निकलहू!
लोकार्पण के कार्यक्रम के सेती संझा 5 बजे ले रात 8 बजे तक खम्हारडीह ले कचना अउ कचना ले खम्हारडीह के मुख्य रद्दा में गाड़ी मन के आना-जाना पूरी तरह ले बंद रही। ये समे में लोगन मन ला बदले हुए रद्दा (रूट डायवर्जन) ले जाना पड़ही। रायपुर ट्रैफिक पुलिस ह यातायात ला संभाले बर एक ठन प्लान जारी करे हे:
अनुपम नगर ले खम्हारडीह-कचना जाए बर: अनुपम नगर ले श्रीराम नगर ओवरब्रिज, अशोक रतन अउ बीएसएनएल आॅफिस होत हुए कचना रेलवे फाटक के तीर ले उल्टें हाथ (बाएं) मुड़के कचना डहर जा सकत हो।
कचना ले खम्हारडीह जाए बर: कचना रेलवे फाटक के पहिली च सीधे हाथ (दाहिने) मुड़के बीएसएनएल आॅफिस, अशोका रतन, श्रीराम नगर ओवरब्रिज अउ अनुपम नगर चौक होत हुए आ-जा सकत हो।
पुलिस के अपील: ट्रैफिक पुलिस ह कहे हे कि कार्यक्रम के समे (संझा 5 ले 8 बजे) बिना कोनो जरूरी काम के ये रद्दा में जाए ले बचो। अगर जाना जरूरी च हे, त जाम ले बचे बर समे से पहिली निकल जाओ।
