7 करोड़ के धान घोटाला : अमित जोगी ल नई मिलिस एको मुसवा, कहिन- सरकार में बैठे VIP मुसवा’ मन डकार गे धान

कवर्धा, 15 जनवरी 2026। कबीरधाम जिला के धान संग्रहण केंद्र मन ले 7 करोड़ रूपया के धान गायब होय के मामला अब गरमा गे हे। अधिकारी मन ह धान के कमी बर ‘मुसवा’ (चूहा) मन ल जिम्मेदार ठहरात हें, जेकर विरोध में जनता कांग्रेस छत्तीसगढ़ (जे) ह मोर्चा खोल दीस हे। जेसीसीजे के प्रदेश अध्यक्ष अमित जोगी ह खुद धान केंद्र पहुँच के ‘असली मुसवा’ मन के तलाश करीन।

अमित जोगी के ‘मुसवा’ खोज अभियान

बाजार चारभाठा संग्रहण केंद्र पहुँच के अमित जोगी ह चप्पा-चप्पा छानीस, फेर ओला वहां एक घलो मुसवा नई मिलिस। जोगी ह सोशल मीडिया में वीडियो शेयर करत कहिन कि धान ल कोनो जानवर मुसवा नई, बल्कि सरकार में बैठे बड़े ‘VIP मुसवा’ मन गबन अउ कमीशनखोरी के चक्कर में डकार गे हें। जोगी कांग्रेस ह अब ‘चूहा पकड़ो अभियान’ चलात हे अउ ‘वांटेड मुसवा’ के पोस्टर लगाके भ्रष्ट अधिकारी मन के जांच के मांग करत हे।

का हे पूरा मामला?

कबीरधाम के दो बड़े केंद्र (बाजार चारभाठा अउ बघर्रा) में जांच के बखत लगभग 26,000 क्विंटल धान कम मिलिस हे, जेकर कीमत 7 करोड़ रूपया बताए जावत हे। जब जिला विपणन अधिकारी ले एखर जवाब मांगे गिस, त ओ ह कहिस कि धान ह खुले में रखे रिहिस, जेला मुसवा, दीमक अउ कीरा मन खा गे हें। ए बयान के बाद ले ही प्रदेश के राजनीति गरमा गे हे।

प्रशासन ह करीस कड़ी कार्रवाई

मामला बढ़त देख के जिला प्रशासन ह बाजार चारभाठा केंद्र के प्रभारी प्रितेश पांडेय ल तुरंत निलंबित कर दीस हे। संग ही, मुसवा मन के बहाना बनाए वाले जिला विपणन अधिकारी (डीएमओ) अभिषेक मिश्रा ल कारण बताओ नोटिस जारी करे गे हे। कलेक्टर ह पूरा मामला के जांच बर एक समिति घलो बना दीस हे, जउन ह ये पता लगाही कि आखिर एतना भारी मात्रा में धान कहां गिस।