छत्तीसगढ़ म ISI एजेंट गिरफ्तार, पाकिस्तान ला भेजत रिहिस जानकारी, जांजगीर पुलिस ह दबोचिस
ISI agent arrested : जांजगीर चांपा: अकलतरा के जेएसडब्ल्यू प्लांट म काम करेइया एक झन मनखे आईएसआई (ISI) के एजेंट निकलिस। आईबी अउ जिला पुलिस ह एक संग मिलके कार्रवाई करत हुए ए संदिग्ध एजेंट ला गिरफ्तार करे हें।
अकलतरा म आईएसआई एजेंट सेवक पिता बलविंदर सिंह (26 साल) ला आईबी अउ स्थानीय पुलिस ह धर दबोचिस। ओहा जेएसडब्ल्यू प्लांट म काम के खोज म आए रिहिस अउ काम घलो शुरू कर दे रिहिस। ओहा मूल रूप ले पंजाब के रहने वाला आय। प्लांट म काम करे के बहाना बना के ओहा पाकिस्तानी सेना बर जासूसी करत रिहिस, जेला आईबी ह पुलिस के मदद ले ओकर कइरा के मकान ले गिरफ्तार करिस हे। अब ओला रिमांड म भेजे के तैयारी चलत हे।
आरोपी सेवक सिंह के जीजा ह अब्बड़ दिन ले जेएसडब्ल्यू प्लांट म काम करत हे। खुफिया जानकारी के आधार म आईबी ह स्थानीय पुलिस के संग मिलके ए संदिग्ध ऊपर चुपचाप नजर रखिस। पक्का सबूत मिले के बाद ओला अकलतरा के मिनीमाता चौक स्थित कइरा के घर ले पकड़े गिस। पूछताछ म आरोपी ह मानिस कि ओहा पिछले कुछ महीना ले पाकिस्तान के आईएसआई गैंग के मनखे मन के संपर्क म रिहिस। ओहा वॉट्सऐप, टेलीग्राम अउ इंस्टाग्राम के माध्यम ले विदेशी नंबर मन म गोठबात करत रिहिस।
पुलिस ला जानकारी मिले रिहिस कि राजीव केडिया के मकान म दूसर राज्य के अब्बड़ मनखे कइरा म रहत हें। पुलिस ह जब कइरादार मन के जांच करिस, त सेवक सिंह संदिग्ध मिलिस। ओकर मोबाइल के जांच करे म पता चलिस कि ओहा पाकिस्तान, सऊदी अरब अउ मैक्सिको के नंबर मन ले आईएसआई के संपर्क म रिहिस।
पुलिस के कहना हे कि आरोपी के काम मन ले देश के सुरक्षा ला बड़ खतरा रिहिस। आरोपी के मोबाइल ले वॉट्सऐप चैट, वीडियो कॉल रिकॉर्ड अउ दूसर डिजिटल सबूत मिले हें, जेला फोरेंसिक जांच बर भेजे गिस हे। जांच म यहू पता चले हे कि आरोपी ला पाकिस्तान ले ड्रोन के माध्यम ले हथियार देवाय के योजना रिहिस, जेकर बाद ओला टारगेट किलिंग (निशाना बना के हत्या) जइसन काम सौंपे जाने वाला रिहिस।
एसपी विजय कुमार पांडे ह बताइन कि आईबी अउ स्थानीय पुलिस ह संदिग्ध युवक ला हिरासत म लेके पूछताछ करत हे, अउ अभी गोपनीयता के सेती सबो बात मन ला उजागर नई करे जा सकत आय।
