बड़े खबर: आईपीएस रतन लाल डांगी निलंबित, आपत्तिजनक फोटो वायरल होए के बाद राज्य सरकार ह करिस कार्रवाई
IPS Ratan Lal Dangi : रायपुर, 26 मार्च 2026/ राज्य सरकार ह पुलिस विभाग के बड़े अधिकारी आईजी आईपीएस (IPS) रतन लाल डांगी ला निलंबित कर दे हे। ये कार्रवाई उंखर आपत्तिजनक फोटो सोशल मीडिया मं वायरल होए के बाद करे गे हे। एखर आदेश गृह (पुलिस) विभाग, छत्तीसगढ़ शासन ह जारी कर दे हे।
शुरुआती जांच मं ये पाए गे हे कि आईपीएस रतन लाल डांगी ह अपन पद के गरिमा के मुताबिक काम नई करिस अऊ अइसन व्यवहार करिस जेखर ले नैतिकता अऊ सेवा नियम मन के उल्लंघन होइस। उंखर ऊपर अपन पद के गलत फायदा उठाए अऊ सामाजिक नियम मन ला तोड़े के घलो आरोप लगे हे।
आदेश मं कहे गे हे कि उंखर फोटो अऊ गतिविधि मन सोशल मीडिया मं भारी वायरल होइन, जेखर ले पुलिस विभाग के इज्जत मं बट्टा लगिस। एखरे आधार मं उंखर खिलाफ अखिल भारतीय सेवा (आचरण) नियम 1968 के तहत कार्रवाई करे गे हे। फिलहाल, रतन लाल डांगी ला सस्पेंड करके विभागीय जांच शुरू कर दे गे हे।
निलंबन के बखत रतन लाल डांगी के मुख्यालय ‘पुलिस मुख्यालय, नवा रायपुर’ तय करे गे हे। जारी आदेश के मुताबिक, सस्पेंशन के दौरान उमन ला नियम के हिसाब ले जीवन निर्वाह भत्ता (Subsistence Allowance) मिलते राही। संगे-संग, बिना कोनो बड़े अधिकारी के अनुमति के वो हा मुख्यालय छोड़ के बाहिर नई जा सकय। शासन के ये फैसला ला अनुशासन बनाए रखे बर एक सख्त कदम माने जात हे।
