दिल्ली ले रायपुर आवत यात्री के छूटिस फ्लाइट, इंडिगो एयरलाइंस ऊपर लागिस ₹60,000 के जुर्माना!
IndiGo Airlines Penalty : रायपुर: फ्लाइट री-शेड्यूल होए अउ टर्मिनल बदले के समय म जानकारी नई देए के मामला म जिला उपभोक्ता विवाद प्रतितोष आयोग ह इंडिगो एयरलाइंस ऊपर 60 हजार रुपिया के जुर्माना लगाए हे। आयोग ह एला सेवा म कमी अउ गलत व्यापार मानिस। आयोग के कहना हे कि समय म एयरपोर्ट पहुंचे के बाद घलो यात्री ह फ्लाइट नई पकड़े पाइस, जेखर से ओला भारी परेशानी अउ आर्थिक नुकसान उठाए बर परिस। आयोग ह एयरलाइंस ला 45 दिन के भीतर मुआवजा देए बर कहे हे, नई त ब्याज घलो देना पड़ही।
टर्मिनल बदले के नई मिलिस जानकारी मामला के जानकारी देवत रायपुर के वकील अमितेश पाठक ह बताइस कि ओ ह अपन परिवार के संग 31 मार्च 2015 ला दिल्ली ले रायपुर आवत रिहिस। इंडिगो के फ्लाइट दिल्ली के टर्मिनल-3 ले उड़े बर रिहिस। मोबाइल म फ्लाइट के समय बदले के मैसेज त आईस, पर टर्मिनल बदले के जानकारी नई दिआइस। जब ओ ह समय म एयरपोर्ट पहुचिस, त पता चलिस कि फ्लाइट टर्मिनल-1 ले जाही। दुनो टर्मिनल के दूरी ज्यादा होए के सेती ओमन समय म नई पहुंचे पाईन अउ फ्लाइट छूट गे।
रात भर लाउंज म बीतेन, दोबारा बिसाइन टिकट फ्लाइट छूटे के बाद परिवार ला पूरी रात एयरपोर्ट के लाउंज म गुजारे बर परिस। दूसर दिन 21,135 रुपिया अउ खरच करके नवा टिकट बिसाइन अउ रायपुर लौटिन।
आयोग ह सुनाइस फैसला रायपुर आके अमितेश पाठक ह उपभोक्ता आयोग म केस दर्ज कराइन। सुनवाई म एयरलाइंस के कोनो अधिकारी नई आईस। आयोग ह एला सेवा म कमी मानत हुए इंडिगो एयरलाइंस ला 45 दिन म 50 हजार रुपिया हर्जाना अउ 10 हजार रुपिया मानसिक परेशानी बर देए के आदेश दिस। समय म पैसा नई देए म 6 प्रतिशत वार्षिक ब्याज घलो देना पड़ही।
