IIIT रायपुर ले 15 लैपटॉप चोरी, सुरक्षा व्यवस्था उपर उठिस सवाल
IIIT Raipur Laptop Theft : नवा रायपुर। रायपुर जिला मा चोर मन के हौसला ह बाढ़ गे हे। नवा रायपुर स्थित ट्रिपल आईटी (IIIT) मा चोरी के एक बड़े घटना आगू आए हे। सातिर चोर मन ह प्रबंधन ल चकमा देके हॉस्टल मा घुसिन अउ छात्र मन के करीब 15 ठन लैपटॉप चोरी करके आराम ले फरार हो गे हें। ए घटना के बाद ट्रिपल आईटी रायपुर के सुरक्षा व्यवस्था उपर बड़े सवाल उठत हे। ये पूरा मामला राखी थाना क्षेत्र के आय।
काम के बहाना बना के हॉस्टल मा घुसिस चोर जानकारी के मुताबिक, सातिर चोर ह हॉस्टल मा कुछ काम के बहाना बनाके भीतर दाखिल होइस। ओ बखत जम्मो छात्र मन परीक्षा दे बर गे रिहिन। खाली हॉस्टल देख के चोर ह मौका के फायदा उठाइस अउ एक के बाद एक 15 लैपटॉप पार कर द़िस। ये पूरा वारदात वहां लगे सीसीटीवी (CCTV) कैमरा मा कैद हो गे हे।
छात्र मन मा भारी नाराजगी घटना के बाद पुलिस ल लिखित शिकायत दे गे हे, जेखर बाद पुलिस ह मामला के जांच सुरू कर दे हे। परिसर मा लगे सीसीटीवी फुटेज ल खंगाले जावत हे। ओती, चोरी के ए घटना ले छात्र मन मा सुरक्षा ल लेके भारी गुस्सा अउ नाराजगी देखे बर मिलत हे।
सीएसपी के कहना नवा रायपुर के सीएसपी तुलसी राम टेकाम ह बताइस कि ट्रिपल आईटी हॉस्टल मा एक अनजान मनखे के घुसे अउ लैपटॉप चोरी होय के सूचना मिले हे, जेखर सीसीटीवी फुटेज घलो वायरल होवत हे। ए मामला मा प्रबंधन या छात्र कोति ले शिकायत के अगोरा हे, शिकायत मिलते ही पुलिस ह आगू के कार्रवाई करही।
