होटल-रेस्टोरेंट बर जरूरी खबर: कमर्शियल गैस के किल्लत के बीच छत्तीसगढ़ एसोसिएशन ह जारी करिस एडवाइजरी
Hotel Restaurant Advisory Raipur : रायपुर। छत्तीसगढ़ में कमर्शियल LPG सिलेंडर के संभावित कमी ल देखत हुए अब होटल अउ रेस्टोरेंट व्यवसाय मन बर बड़े खबर आगू आए हे। ‘छत्तीसगढ़ होटल एंड रेस्टोरेंट एसोसिएशन’ ह परदेस भर के होटल, रेस्टोरेंट अउ फूड व्यवसाय ले जुड़े मनखे मन बर एक खास एडवाइजरी (Advisory) जारी करे हे। एसोसिएशन ह साफ तौर ले अपील करे हे कि कोनो घलो संचालक घबरा के गैस सिलेंडर मन ल जमा झन करय अउ संयम बना के रखय।
खबर के मुताबिक, सप्लायर मन डहर ले कमर्शियल गैस के आवक में कुछ कमी के आशंका जताए जावत हे, जेकर सेती ये कदम उठाए गे हे।
एडवाइजरी में का-का हे खास निर्देश?
एसोसिएशन डहर ले जारी एडवाइजरी में कुछ जरूरी बात मन ल बताए गे हे, ताकि सप्लाई गड़बड़ाए के बाद घलो काम-काज चलत रहे:
मेनू अउ किचन ऑपरेशन: होटल संचालक मन ल सलाह दे गे हे कि ओमन सिरिफ जरूरी किचन ऑपरेशन अउ खास मेनू आइटम मन ल ही प्राथमिकता देवय, ताकि सीमित गैस में घलो ग्राहक मन ल सेवा मिलत रहे।
बिजली के चूल्हा के उपयोग: जंहा घलो संभव हो, वंहा इंडक्शन चूल्हा, इलेक्ट्रिक राइस कुकर अउ दूसर बिजली के सामान मन के उपयोग करे के सलाह दे गे हे, ताकि LPG ऊपर निर्भरता ल कम करे जा सके।
वैकल्पिक ईंधन: एसोसिएशन ह PNG (पाइप्ड नेचुरल गैस) अउ दूसर ईंधन व्यवस्था ऊपर घलो विचार करे बर कहे हे।
“अनावस्यक स्टॉक ले बिगड़ सकथे व्यवस्था”— अध्यक्ष तरनजीत सिंह
एसोसिएशन के अध्यक्ष तरनजीत सिंह होरा ह बताइस कि ओमन कमर्शियल LPG सप्लाई के स्थिति ल लेके अधिकारी मन अउ गैस सप्लायर मन ले लगातार संपर्क बना के रखे हें। ओमन उम्मीद जताइन कि ये समस्या के समाधान जल्दी हो जाही। होरा ह कहिस कि, “अनावस्यक रूप ले गैस सिलेंडर के स्टॉक झन करव, ताकि सप्लाई व्यवस्था संतुलित बनी रहे अउ सब ल गैस मिल सके।”
