रायपुर म होली के खुमारी: 4 दिन म पियक्कड़ मन गटक गे 58 करोड़ के दारू, ‘विदेशी’ के बढ़िस क्रेज
Holi Alcohol Record : रायपुर। छत्तीसगढ़ के राजधानी रायपुर म ए बछर होली के तिहार म मदिरा प्रेमी मन अइसन रंग जमइन कि आबकारी विभाग के घलो आँखि फटी के फटी रह गे। होली के सुव्वर म सिरिफ़ चार दिन के भीतर रायपुर जिला म कुल 58 करोड़ 10 लाख रुपिया के दारू बिचाइस। पिछले बछर के तुलना म ए बछर लोगन मन ह 91 लाख रुपिया के जादा दारू पी डारिन।
होली ले पहिली ही जमा कर लिन स्टॉक आबकारी विभाग कोति ले जारी आंकड़ा मन ले पता चलिस हे कि शराब प्रेमी मन ए बछर कोनो रिस्क नई लेना चाहत रहिन। होली के दिन (4 मार्च) दुकान बंद रहिस, एखर सेती लोगन मन ह 3 दिन पहिली ले ही स्टॉक जमा करना सुरु कर दे रहिन। सबले जादा बिक्री 3 मार्च (होली के एक दिन पहिली) होइस, जब एक दिन म 21 करोड़ 73 लाख रुपिया के दारू बिकिस। ओखरे पहिली 2 मार्च के 15.94 करोड़ अउ 1 मार्च के 12.11 करोड़ के बिक्री दर्ज करे गिस।
देशी ले जादा विदेशी के नसा ए बछर के आंकड़ा म एक बड़े बदलाव देखे बर मिलिस हे। रायपुर म अब ‘देशी’ दारू के शौकीन मन कम होवत हें अउ ‘विदेशी’ के मांग बढ़त जावत हे। विदेशी स्प्रिट अउ माल्ट के बिक्री म पिछले बछर के तुलना म 60 प्रतिशत तक के बढ़ोत्तरी दर्ज करे गे हे। देशी दारू के बिक्री म ओतना बढ़त नई दिखीस, जतका विदेशी म दिखीस।
होली के ‘हैंगओवर’ संझा तक रहिस होली के दिन दुकान बंद होय के बाद घलो खुमारी कम नई होइस। 5 मार्च के जब दुकान खुलिस, त संझा तक 8 करोड़ 31 लाख रुपिया के दारू अउ बिक गे। जानबा होवय कि राजधानी रायपुर म शराब के ये ‘अर्थशास्त्र’ हर बछर नवा रिकॉर्ड बनात हे। प्रशासन ह ड्राय डे (Dry Day) घोषित करे रहिस, फेर मदिरा प्रेमी मन पहिली ले ही अपन इंतजाम पुख्ता कर ले रहिन।
