15 अगस्त के ‘पैग म पहरा’: छत्तीसगढ़ म दारू दुकान अउ बार मन म लटकही ताला!
रायपुर। 15 अगस्त यानी अजादी के दिन जश्न मनाए बर दारू के रद्दा पूरा बंद रही। छत्तीसगढ़ सरकार ह 15 अगस्त के पूरा प्रदेश म शराब के बिक्री म पूरा पूरी रोक लगाए के फैसला करे हे। आबकारी विभाग ह सबो कलेक्टर मन ल आदेश जारी कर दे हे। मतलब 15 अगस्त के देशी-विदेशी दारू दुकानच नोहे, बल्कि दूसर लाइसेंस वाले जत्के घलो ठिकाना हे, सब म ताला लटकही।
एक दिन पूरा प्रदेश ‘ड्राई’
आबकारी विभाग के निरदेस के मुताबिक 15 अगस्त के ‘सुष्क दिवस’ (ड्राई डे) घोषित करे गे हे। ए दौरान प्रदेश के सबो देशी अउ विदेशी मदिरा दुकान मन बंद रही। कंपोजिट मदिरा दुकान म घलोक बिक्री नइ होही। सरकार ह साफ कर दे हे कि ए रोक पूरा राज म लागू रही।
बार ले लेके गोदाम तक बंद
सरकार ह सिर्फ दारू दुकान तक रोक ल सीमित नइ रखे हे। दारू के गोदाम अउ एफएल-3 (ग) पर्यटन बार मन ल घलो बंद रखे बर लागही। मतलब दारू के बिक्री अउ रखे ले जुड़े सबो बड़े ठिकाना म 15 अगस्त के कोनो कारोबार नइ हो सकय। दुकान ले लगे अहाता मन ल घलो बंद रखे के निरदेस दे गे हे।
कलेक्टर मन ल मिलीस जिम्मेदारी
आबकारी आयुक्त कार्यालय, नवा रायपुर ह प्रदेश के सबो कलेक्टर मन ल कड़ा कारवाही करे के निरदेस दे हे। प्रशासन ल अपन-अपन जिला म ए आदेश के सख्ती ले पालन कराय बर पड़ही। दारू दुकान अउ दूसर ठिकाना मन के निगरानी घलो बढ़ाए ल पड़ही। कोनो भी जगा नियम टूटही त ओकर कारवाही के जिम्मेदारी स्थानीय प्रशासन के होही।
अवैध बिक्री म सीधा वार
सरकार ल सबले जादा चिंता बंद के दिन अवैध दारू के बिक्री के हे। आदेश म साफ कहे गे हे कि 15 अगस्त के दारू के गैरकानूनी बेचना, रखना अउ ढोना (परिवहन) नइ होना चाही। एकर बर आबकारी टीम अउ प्रशासन ल हुसियार रहे बर कहे गे हे। मतलब दुकान बंद करके पछुआ रद्दा ले धंधा चलाए वाला मन म घलो नजर रही।
माल छिपा के बेचे वाला मन म नजर
दारू दुकान बंद रहे के बखत अवैध माल बेचे के आशंका बने रहिथे। एही पाए के विभाग ह सिर्फ शटर बंद कराए के बजाय अवैध बिक्री अउ ढोना रोके म जादा जोर दे हे। प्रशासन ल ए सुनिश्चित करे बर पड़ही कि ड्राई डे के आदेश सिर्फ कागज म मत रह जाय।
जश्न रही, दारू नइ
15 अगस्त देश बर बहुत बड़का दिन ए। आजादी के तिहार म सरकारी कार्यक्रम अउ सार्वजनिक आयोजन के बीच दारू के बिक्री पूरा बंद रही। अइसन म दारू के सोकीन मन ल पहिली ले अपन इंतजाम देखे बर पड़ही। हालांकि नियम के बाद ओ दिन दारू बिसाना या बेचना कानूनन संभव नइ होही।
अब निगरानी के असली परिक्षा
सरकार ह आदेश त जारी कर दे हे, अब असली परिक्षा मैदान म होही। कतिक दुकान बंद रहिथे, अवैध बिक्री कतिक रुकथे अउ चोरी-छिपे दारू पहुंचाए वाला मन म कतिक कारवाही होथे, ए हा 15 अगस्त के सोझा आही। फिलहाल आबकारी विभाग ह कलेक्टर मन के जरिया पूरा प्रदेश म सख्ती के संदेसा दे दे हे।
