गैस संकट के बीच प्रशासन के बड़ फैसला, लइका मन ल मिलही 5 किलो के सिलेंडर, ये कागजात देखाए बर परही
Student Gas Cylinder : रायपुर। छत्तीसगढ़ म एलपीजी गैस सिलेंडर के किल्लत के बीच पढ़इया लइका मन बर राहत भरी खबर निकल के आगू आए हे। प्रशासन ह लइका मन के सुविधा ल देखत हुए एक बड़ फैसला लीस हे, जेकर तहत अब जिला म रहइया छात्र मन ल 5 किलो के छोटा गैस सिलेंडर देया जाही।
दरअसल, कलेक्टर डॉ. गौरव सिंह के निर्देश म कलेक्टोरेट परिसर के रेडक्रॉस हॉल म अपर कलेक्टर कीर्तिमान सिंह राठौर ह जिला के एलपीजी गैस वितरक मन के समीक्षा बैठक लीन। ए बैठक म गैस के आपूर्ति, वितरण व्यवस्था अउ उपभोक्ता मन के समस्या मन ऊपर विस्तार ले गोठ-बात होइस।
अपर कलेक्टर राठौर ह कहिन कि जिला म रहइया छात्र मन ल 5 किलो के छोटा सिलेंडर गैस एजेंसी कोति ले आधार कार्ड अउ निवास प्रमाण पत्र देखे के बाद देया जाही। ओमन बताइन कि जिला म एलपीजी सिलेंडर के पर्याप्त स्टॉक हे अउ नियम के मुताबिक उपभोक्ता मन ल सिलेंडर बांटे जात हे। वितरक मन ल कड़ा हिदायत दे गे हे कि वितरण म ककरो भी कोति ले लापरवाही नई होना चाहिए। अगर कोई वितरण म बाधा डालही या डिलिवरी मैन ले बदतमीजी करही, त ओखर खिलाफ कड़ी कार्रवाई करे जाही।
ओमन आगू कहिन कि अस्पताल, वृद्धाश्रम, अउ अनाथालय मन म गैस के कमी नई होना चाहिए। ऑयल कंपनी के प्रतिनिधि ह बताइस कि अभी शहर म 25 दिन अउ गांव म 45 दिन के लिमिट रखे गे हे, जेकर बादेच नवा बुकिंग हो पाही। अभी नवा कनेक्शन अउ सिंगल-डबल कनेक्शन ले ऊपर रोक लगे हे। रायपुर जिला के गैस वितरक संघ ह मनखे मन ले अपील करे हे कि घबराव झन, पर्याप्त स्टॉक हे, बस व्यवस्था बनाए म सहयोग करव। ए बैठक म खाद्य नियंत्रक भूपेन्द्र मिश्रा अउ जिला के जम्मो खाद्य निरीक्षक उपस्थित रहिन।
