सहारा इंडिया के भगौड़ा ब्रांच मैनेजर गिरफ्तार, 3,848 निवेशक मन ले करे राहय ₹40.78 करोड़ के ठगी
रायगढ़: रायगढ़ पुलिस ला ‘ऑपरेशन क्लीन हंट’ के तहत बड़का सफलता मिले हे। सहारा इंडिया के नाम पर ठगी करे वाले मामला म पिछले 3 साल ले फरार चलत कबीर चौक साखा के ब्रांच मैनेजर विजय कुमार शराफ (54) ला पुलिस ह धर दबोचे हे। पुलिस ह आरोपी ला अदालत म पेस करिस, जिहां ले ओला जेल (न्यायिक रिमांड) भेज दे गय हे।
ए मामला के खुलासा 29 सितंबर 2022 को होय रिहिस, जब कृष्णा विहार कॉलोनी के रहइया विकास निगानिया ह थाना कोतवाली म रिपोर्ट दरज कराय रिहिस। पीड़ित के कहना रिहिस कि सहारा इंडिया के अफ़सर मन ह आरबीआई ले मान्यता मिले के लबरा भरोसा देवा के ओकर, ओकर महतारी अउ घरवाली के लगभग ₹40 लाख रूपिया साल 2017 म अलग-अलग योजना म जमा कराय रिहिन। जब पइसा पाके के समे (Maturity) पूरा होगे अउ पइसा नई मिलिस, तब छानबीन करे म पता चलिस कि सहारा इंडिया के नाम म पइसा लेके दूसरा-दूसरा सहकारी समिति के बॉन्ड दे देय राहयं।
एसएसपी शशि मोहन सिंह के अगवाई म चलत जांच म जिला प्रशासन, बैंक अउ मंत्रालय ले मिले कागजात मन के आधार म अब तक रायगढ़ अउ दुसर जिला के 3,848 निवेशक मन ले कुल ₹40,78,16,739 के ठगी के खुलासा हो चुके हे।
पुलिस ला मुखबिर ले सूचना मिले रिहिस कि आरोपी विजय कुमार शराफ ह अपन ससुराल कोतरारोड़ आय हवे। खबर मिलते ही कोतवाली पुलिस ह घेराबंदी करके ओला धर लिस। आरोपी के करा ले फ्रेंचाइजी दफ़्तर के आदेश पत्र अउ एमओयू (MoU) के कॉपी जप्त करे गे हे।
ए मामला म पुलिस ह पहिली ले सहारा इंडिया के पूर्व शाखा प्रबंधक ओम प्रकाश शर्मा, खरसिया के पूर्व शाखा प्रबंधक पुष्पेंद्र कुमार साहू, कंपनी डायरेक्टर करुणेश अवस्थी, सेक्टर मैनेजर अमृत लाल श्रीवास अउ बिलासपुर के रीजनल मैनेजर रजनीश तिवारी ला गिरफ्तार करके कोर्ट म चालान पेस कर चुके हे। आरोपी मन के करा ले आईकार्ड, नियुक्ति पत्र, बैंक खाता, जमीन के कागजात अउ ठगी के पइसा ले बिसाए गाड़ी अउ मोटर सायकल जप्त करे जा चुके हे।
ए कार्रवाई म थाना प्रभारी कोतवाली निरीक्षक सुखनंदन पटेल, एएसआई विल्फ्रेड मसीह अउ ओकर टीम के बड़का योगदान रिहिस। एसएसपी शशि मोहन सिंह ह साफ़ संदेसा दे हे कि जनता के खून-पसीना के कमाई ठगे वाले ककरो ला बख्शे नई जाही अउ बाकी फरार आरोपी मन के खोजबीन जारी राही।
