पूर्व आर्मी चीफ एमएम नरवणे के किताब ला लेके संसद में भारी बवाल: जानव आखिर का लिखे हे ‘Four Stars of Destiny’ में
Parliament Row : नई दिल्ली। पूर्व आर्मी चीफ जनरल मनोज मुकुंद नरवणे (MM Naravane) के लिखे आत्मकथा ‘Four Stars of Destiny: An Autobiography’ ह इन दिन संसद ले लेके सड़क तक गरमाए हुए हे। बजट सत्र के दूसरे दिन, 2 फरवरी 2026 के लोकसभा में नेता प्रतिपक्ष राहुल गांधी ह ये किताब के कुछ अंश मन के जिक्र करिन, जेकर बाद सदन में भारी हंगामा मच गे। स्पीकर ओम बिरला ह राहुल गांधी ला बीच में टोक दीन, जेकर से सत्ता पक्ष अऊ विपक्ष के बीच जुबानी जंग सुरू होगे।
किताब में अइसन का हे जेकर से मचिस बवाल? ये किताब करीब 448 पेज के हे, जेमा जनरल नरवणे के 40 साल के सैन्य करियर के किस्सा हे। मीडिया रिपोर्ट के मुताबिक, किताब में दो बड़े खुलासा करे गे हे:
लद्दाख स्टैंडऑफ (चीन विवाद): किताब में लिखे हे कि 31 अगस्त 2020 के रात रेचिन ला पास में चीनी टैंक मन भारतीय सेना के एकदम करीब (कुछ सौ मीटर दूर) पहुंच गे रहीन। नरवणे ह राजनाथ सिंह अऊ अजीत डोभाल मन ला फोन करके पूछिन कि “मोर ऑर्डर्स का हे?” नरवणे के कहना हे कि ओ समय ओ मन ला ‘हॉट पोटैटो’ (गरम आलू) थमा दे गे रहीस, मतलब पूरा जिम्मेदारी ओकर ऊपर छोड़ दे गे रहीस। कोई साफ निर्देश नइ मिलिस कि गोली चलाना हे कि नइ।
अग्निपथ योजना: किताब में ये घलोक लिखे हे कि सेना ह अग्निपथ योजना बर तइयार नइ रहीस। नरवणे ह सुरूवाती तनख्वाह (20 हजार) ला ‘नइ माने लायक’ (Unacceptable) बताइन अऊ कहिन कि एक फऊजी ला रोज के कमाय-खाय वाला मजदूर ले तुलना नइ करे जा सके।
संसद में राहुल गांधी के हमला राहुल गांधी ह लोकसभा में एक मैगजीन के लेख ला दिखावत कहिन कि किताब में लिखे बात 100 प्रतिशत सच हे। ओ मन ह चीन सीमा के सुरक्षा अऊ कैलाश रेंज में चीनी टैंक मन के मौजूदगी ला लेके सरकार ला घेरिन। राहुल गांधी के कहना रहीस कि पूर्व आर्मी चीफ के बात मन ले पता चलथे कि सीमा में स्थिति कतका गंभीर रहीस।
का कहिथें पूर्व आर्मी चीफ? ये किताब अभी तक छपे नइ हे काबर कि रक्षा मंत्रालय (MoD) अऊ सेना ह एकर सुरक्षा समीक्षा (Review) करत हे। किताब के प्रकाशन में देरी ला लेके अक्टूबर 2025 में जनरल नरवणे ह कहिन रहीस कि— “ये ह पुरानी शराब के कस हे, जतका देरी होही ओतके जादा विंटेज अऊ कीमती होही।” अभी तक मंत्रालय ले येला एनओसी (NOC) नइ मिले हे।
