परीक्षा ब्रेकिंग : छत्तीसगढ़ में 5वीं अउ 8वीं बोर्ड परीक्षा के तारीख घोषित, DPI ह जारी करीस निर्देश
रायपुर, 21 जनवरी 2026: छत्तीसगढ़ के सरकारी अउ मान्यता प्राप्त प्राइवेट स्कूल मन बर बड़े खबर हे। सत्र 2025-26 बर कक्षा 5वीं अउ 8वीं के केन्द्रीकृत (बोर्ड पैटर्न) परीक्षा के तारीख मन के घोषणा कर दे गे हे। लोक शिक्षण संचालनालय (DPI) डहार ले जारी आदेश के मुताबिक, 5वीं के परीक्षा 17 मार्च ले अउ 8वीं के परीक्षा 18 मार्च ले शुरू होही।
DPI ह साफ कहिदे हे कि परीक्षा के सफल संचालन के पूरा जिम्मेदारी जिला शिक्षा अधिकारी (DEO) के होही। ए परीक्षा में राज्य के जम्मो सरकारी स्कूल, अनुदान प्राप्त स्कूल अउ माशिमं (CGBSE) ले जुड़े प्राइवेट स्कूल मन के लइका मन ला सामिल होना अनिवार्य हे। फेर, CBSE अउ ICSE स्कूल मन एमा सामिल नई होय।
परीक्षा ले जुड़े मुख्य बात मन:
-
रोल नंबर: DEO डहार ले जम्मो लइका मन ला 28 फरवरी 2026 तक रोल नंबर आबंटित कर दे जाही।
-
प्रश्न पत्र: पेपर पिछला साल के ब्लूप्रिंट के आधार पर बनही। गोपनीयता बनाय बर तीन सेट पेपर तइयार करे जाही।
-
प्रायोजना कार्य (Project): 5वीं बर 10 अंक अउ 8वीं बर 20 अंक के प्रोजेक्ट काम होही, जेला 28 फरवरी तक पूरा करना हे।
-
परीक्षा शुल्क: प्राइवेट स्कूल मन ला 5वीं बर 55 रुपिया अउ 8वीं बर 60 रुपिया प्रति छात्र के दर ले शुल्क जमा करना होही।
मूल्यांकन अउ समिति:
परीक्षा के देखरेख बर जिला स्तर में एक संचालन समिति बनाय जाही, जेकर अध्यक्ष DEO होही। उत्तर पुस्तिका मन के जांच बर शिक्षक मन ला पारिश्रमिक घलो दे जाही। 5वीं के कॉपी जांचे बर 2 रुपिया अउ 8वीं बर 3 रुपिया प्रति कॉपी के दर तय करे गे हे।
