छोटे ऊपर लूट अउ बड़का मन ला छूट : 50 बड़े सरकारी विभाग मन मा 26 करोड़ के बिजली बिल बाकी…
Electricity Bill Dues : राजनंदगांव। आम मनखे मन जइसने दू महीना के बिजली बिल नई पटावन, तइसने ओमन के घर बिजली काटे बर पहुंचइया बिजली कंपनी ह बड़े बकायादार मन ऊपर कतको मेहरबान दिखत हे। अकेले राजनंदगांव जिला मा करीब पचास सरकारी विभाग अइसन हें, जेमन ले बिजली कंपनी ला 26 करोड़ रुपिया वसूल करना हे। कंपनी डहर ले लगातार नोटिस घलो भेजे जात हे, फिर घलो बिल पटाए बर ये विभाग मन गंभीर नई हे।
बिजली कंपनी ह वसूली बर संभागीय कार्यालय ला जानकारी भेजथे। पता चले हे कि सरकारी विभाग मन मा बिजली बिल के रुपिया कतको बछर ले बाकी हे, ओकर बाद घलो ये विभाग मन ऊपर कोई कड़क कारवाही नई करे जाय। अउ दूसर कोती, आम लोगन मन के जइसने दू महीना के बिल घलो बाकी रहिथे, त ओकर कनेक्शन काटे बर पहुंच जाथें। अफ़सर मन के कहना हे कि वसूली बर नोटिस भेजे जात हे।
नगर निगम आय सबले बड़े बकायादार
बिजली कंपनी ले मिले जानकारी के मुताबिक, सबले जादा राजनंदगांव नगर निगम मा 13 करोड़ 11 लाख रुपिया, ग्रामीण विभाग मा 6 करोड़ 55 लाख रुपिया, पुलिस विभाग मा 27 लाख 76 हजार रुपिया अउ आदिमजाति कल्याण विभाग मा 19 लाख 33 हजार रुपिया बाकी हे। इही रकम ले पचास विभाग मन के बकाया राशि हर बछर बाढ़ के 26 करोड़ रुपिया तक पहुंच गे हे। ये आकड़ा ह पिछले बछर 21 करोड़ तक रिहिस, जेकर भुगतान नई होए के सेती बकाया राशि ह लगातार बाढ़त जावत हे।
दिन मा घलो जरत हे लाइट
राजनंदगांव नगर निगम ह बिजली कंपनी के लिस्ट मा सबले ऊपर हे। निगम ले बिजली कंपनी ला 13 करोड़ ले जादा के रुपिया वसूलना हे। शहर मा स्ट्रीट लाइट के खरचा बाढ़ गे हे। बड़ लापरवाही यहू हे कि रात मा त स्ट्रीट लाइट जरवे करथे, पर ओला दिन भर घलो जरा के छोड़ देथें, जेकर से बिजली कतको खरचा होवत हे। गरमी के दिन होए के सेती खपत अइसने जादा हे, अइसन मा निगम ला अभियान चला के दिन मा लाइट जरइया पोल मन ऊपर कारवाही करना चइही।
