ED Action Raipur To Mumbai : रायपुर ले मुंबई तक ईडी के हड़कंप : 2434 करोड़ के घोटाला म 30 जगह छापा, बड़े उद्योगपति मन के ठिकान म जांच जारी
ED Action Raipur To Mumbai : रायपुर: छत्तीसगढ़ के राजधानी रायपुर समेत देशभर के कई बड़े सहर मन म आज बिहनिया ले प्रवर्तन निदेशालय (ED) ह भारी दबिश दीस हे। रायपुर, मुंबई, नासिक अउ बेंगलुरु के 30 ले जादा ठिकान म एक साथ छापा मार के ईडी ह हड़कंप मचा दे हे। ए पूरा कार्रवाई 2,434 करोड़ रुपया के मनी लॉन्ड्रिंग अउ धोखाधड़ी के मामला ले जुड़े हे, जेमा बड़े-बड़े मनखे मन के नाम सामिल हे।
ED Action Raipur To Mumbai : काबर पड़िस छापा?
जानकारी के मुताबिक, ए मामला सीबीआई (CBI) म दर्ज एक शिकायत ले सुरु होइस। आरोप हे कि रियल एस्टेट म निवेश के बहाना बना के निवेशक मन ले 2,434 करोड़ रुपया के ठगी करे गे हे अउ ए पैसा ला हेराफेरी करके दूसर जगह खपा दे गे हे। ईडी अब ए पैसा के हिसाब-किताब खोजत हे कि एतका बड़े रकम कहाँ अउ कइसे छुपाय गे हे।
read more : Kanker Violence : कांकेर म लाश दफनाय बर खूनी संग्राम : कब्र ला खोदििस, चर्च म लगाइस आगी… ASP समेत 25 झन घायल
कोन हें निशाने म?
बताय जावत हे कि ईडी के मुख्य फोकस जय कॉर्प लिमिटेड के डायरेक्टर अउ बड़े उद्योगपति आनंद जयकुमार जैन, ओखर संगी-साथी अउ व्यापारिक पार्टनर मन के ऊपर हे। मुंबई म ईडी के टीम ह करीब 20 जगह जांच करत हे, उही मेर रायपुर, नासिक अउ बेंगलुरु म घलो 10 ठिकान म दबिश दीस हे। रायपुर म घलो कुछ बड़े कारोबारी मन के दफ्तर अउ घर म अधिकारी मन दस्तावेज खंगालत हें।
छत्तीसगढ़ म मचीस खलबली
रायपुर म जइसे ही ईडी के छापा के खबर फैलिस, कारोबारी अउ राजनीतिक गलियारा म खलबली मच गे। सुरक्षा बल मन के साथ अधिकारी मन बिहनिया ले ही ठिकान म मौजूद हें अउ कोनो ला भी भीतर-बाहर जाय के अनुमति नई हे। जांच म कई ठन जरूरी कागज अउ डिजिटल सबूत घलो मिले के खबर हे।
