नकली कंपनी बना के 38 लाख के ठगी: पइसा ल दुगुना करे के लालच देके बनाइन शिकार
durg investment fraud news : दुर्ग। हमर दुर्ग जिला मा एक अइसन मामला आगू आए हे जेमा नकली निवेश कंपनी बना के लोगन मन ले लाखों के ठगी करे गे हे। पइसा ल तीन महीना मा दुगुना करे के झांसा देके आरोपी मन ह एक झन ले 38 लाख 25 हजार रूपिया ठग लीन। पुलिस ह ए मामला मा एक आरोपी ल गिरफ्तार कर ले हे।
कइसे फंसिन ठग मन के जाल मा?
संतरा बाड़ी (दुर्ग) के रहने वाला जयदीप सिंह कंडा ह पुलिस मा शिकायत दर्ज कराय रिहिस। ओखर कहना हे कि आरोपी धर्मेंद्र कुमार बंजारे अऊ ओकर संगी मन ह नकली ‘AMS Solution’ अऊ ‘M/s R-V Group Company’ बनाइन। ए मन ह जयदीप ल झांसा दीन कि अगर ओ मन के कंपनी मा पइसा लगाही त ओहा 3 महीना मा दुगुना हो जाही। लालच मा आके जयदीप ह कुल 38 लाख 25 हजार रूपिया ओ मन ल सउंप दीस।
रायपुर ले धरािस आरोपी
जब पइसा वापस नइ मिलिस त जयदीप ल ठगी के अहसास होइस। वैशाली नगर पुलिस ह मामला के गंभीरता ल देखत हुए जांच सुरु करिस अऊ आरोपी धर्मेंद्र कुमार बंजारे ल सड्डू (रायपुर) ले दबोच लीस। पुलिस के पूछताछ मा आरोपी ह अपन अपराध ल स्वीकार कर ले हे।
पुलिस के कार्रवाई अऊ रिमांड
पुलिस ह आरोपी ल गिरफ्तार करके कोर्ट मा पेश करिस, जिहां ले ओला न्यायिक रिमांड मा जेल भेज दे गे हे। पुलिस अब ए पता लगावत हे कि ए गिरोह मा अऊ कतका झन सामिल हें अऊ ए मन ह अऊ कतका लोगन मन ल अपन ठगी के शिकार बनाय हें।
