भिलाई म डिजिटल डकैती : बीएसपी के रिटायर्ड कर्मचारी ले 37.50 लाख के ठगी, फेसबुक के चक्कर म गवागे बुढ़ापा के सहारा
भिलाई। स्टील सिटी भिलाई म साइबर ठग मन ह एक बार फिर बड़े हाथ मारे हें। ए बार ठग मन के शिकार बने हे भिलाई स्टील प्लांट (BSP) के एक रिटायर्ड कर्मचारी, जेखर मेहनत के 37.50 लाख रुपिया ला ठग मन ह चुटकी म साफ कर दीन। फेसबुक म ‘जादा मुनाफा’ के लालच अउ एक छोटे से विज्ञापन ह बुजुर्ग बर बर्बादी के कारण बन गे।
अइसने बिछाइन ठगी के जाल रिसाली म रहने वाला निरंजन प्रसाद ह बीएसपी ले रिटायर होय के बाद अपन पैसा ला सही जगह निवेश करना चाहत रिहिस। फरवरी म ओ ह फेसबुक म एक विज्ञापन देखिस, जेमा बैंक ले जादा ब्याज दे के दावा करे गे रिहिस। जब निरंजन ह ओ नंबर म फोन करिस, त ठग मन ह ओला भरोसा दिलाइन कि हर महीना 4% के मुनाफा मिलही।
भरोसा जीत के मारिन डाका शुरुआत म निरंजन ला थोक-बहुत पैसा मुनाफा के रूप म घलो दीन, जेखर ले ओखर भरोसा बढ़ गे। बस एही भरोसा के फायदा उठाके ठग मन ह अलग-अलग किस्त म निरंजन ले 37.50 लाख रुपिया अपन खाता म डलवा लीन। ए पैसा पुणे, चेन्नई अउ बेंगलुरु के अलग-अलग कंपनी मन के खाता म ट्रांसफर कराय गिस। 4 महीना बाद जब पैसा मिलना बंद होइस अउ ठग मन के फोन बंद मिले लागिस, तब निरंजन ला समझ म अइस कि ओखर संग धोखा हो गे हे।
सावधान रहव संगवारी हो! अइसने ठगी ले बचे बर कभु घलो फेसबुक या सोशल मीडिया म दिखे वाला ‘पैसा डबल’ करे के लालच म झन आवव। कोनो घलो अनजान मनखे के कहे म अपन खाता ले पैसा ट्रांसफर झन करव। आप मन के थोकन सावधानी ही आप मन के गाढ़ा कमाई ला सुरक्षित रख सकत हे। नेवई पुलिस अउ साइबर सेल अभी ए मामला के जांच करत हें।
