दंतेवाड़ा के आदिवासी बेटी अंजू पाथरे बनिस सिविल जज, जिला म खुसी के माहौल
Dantewada News : दंतेवाड़ा। हमर दंतेवाड़ा जिला के आदिवासी बेटी अंजू पाथरे ह सिविल जज बनके पूरा इलाका के मान बढ़ा दिस हे। अंजू के ए सफलता ले पूरा जिला म खुसी के माहौल हे। कम संसाधन अउ कतकोन दुख-तकलीफ के बाद घलो हार नहीं मानिस अउ लगातार मेहनत करके अंजू ह ए मुकाम ल हासिल करिस। अब ओ ह क्षेत्र के युवा मन बर प्रेरणा बन गे हे।
अंजू पाथरे ह अपन पहिली के पढ़ाई जवाहर नवोदय विद्यालय बारसूर ले करे हे। ओकर बाद गुरु घासीदास विश्वविद्यालय बिलासपुर ले बीकॉम एलएलबी अउ डॉ. सीवी रमन विश्वविद्यालय ले मास्टर डिग्री लीस। अंजू के ददा हीरावत राम पाथरे ह पुलिस विभाग म एएसआई के पद म थाना अरनपुर म पदस्थ हें, अउ महतारी अनिता पाथरे ह घर-गृहस्थी सम्हालथें। ओकर बड़ बहिन योगिता पाथरे घलो नायब तहसीलदार के पद म भानुप्रतापपुर म काम करत हे।
अंजू ह अपन सफलता के श्रेय परिवार के सहयोग अउ सही रद्दा देखाय ल दे हे। बता दन कि अंजू के ए चौथा प्रयास रहिस। एकर पहिली तीन बार ओ ह इंटरव्यू तक पहुंच गे रहिस, फेर सफलता हाथ नहीं आइस। ओकर बाद घलो ओ ह हिम्मत नहीं हारिस अउ पढ़ई जारी रखिस। आज ओकर आत्मविश्वास अउ कड़ा मेहनत ह ओला जज बना दिस। अंजू के ए उपलब्धि म जिला के मनखे मन ओला बधाई देवत हें।
