समर्पण के बाद खुलत हे नक्सली मन के राज… जंगल ले विस्फोटक के जखीरा बरामद
Chhattisgarh News : जगदलपुर। दक्षिण बस्तर के दंतेवाड़ा जिला में नक्सल विरोधी अभियान के बखत सुरक्षा बल मन ला बड़ सफलता मिले हे। बारसूर थाना क्षेत्र के तोडमा गांव के घना जंगल में सर्च ऑपरेशन के दौरान नक्सली मन के लुकाए भारी विस्फोटक डंप बरामद करे गिस। ए कार्रवाई CRPF के 195वीं वाहिनी अउ जिला पुलिस के संयुक्त टीम ह खुफिया जानकारी के आधार पर करे हे।
सुरक्षा बल मन ला ऑपरेशन के दौरान जंगल में लुका के रखे विस्फोटक सामान अउ हथियार मन के जखीरा मिलिस, जेमा इलेक्ट्रिक डेटोनेटर, INSAS अउ SLR राउंड, ग्रेनेड ले जुड़े सामान, जिलेटिन, सेफ्टी फ्यूज वायर अउ संचार उपकरण सामिल हे। एकर अलावा एक ठन भरमार राइफल, वायरलेस सेट, बैटरी अउ नक्सली साहित्य घलो जब्त करे गे हे।
ए कार्रवाई ले पता चलत हे कि समर्पण के बाद नक्सली मन के लुकाए नेटवर्क अउ हथियार अब धीरे-धीरे आगू आवत हें। ऑपरेशन के बाद जम्मो जवान मन सुरक्षित लहुट गे हें, उहें बरामद सामान मन ला लेके आगू के कानूनी कार्रवाई जारी हे।
