दंतेश्वरी मंदिर मा भक्ति के डिजिटल रंग, दुबई ले घलो होवत हे ज्योत के बुकिंग…
Bastar News : जगदलपुर: बस्तर के आराध्य देवी माई दंतेश्वरी के मंदिर मा चैत्र नवरात्र के तइयारी जोरों-सोरों ले चलत हे। 19 मार्च ले शुरू होवइया ये आस्था के परब मा इस बार बस्तर के रंग पूरी तरह ले डिजिटल नजर आवत हे। जगदलपुर के ऐतिहासिक मंदिर मा अब भक्त मन ला लाइन मा लगे के जरूरत नहीं हे, काबर कि मंदिर प्रबंधन ह ऑनलाइन बुकिंग के सुविधा दे दे हे।
3 हजार ले जादा ज्योत जले के अनुमान मंदिर समिति के मुताबिक, ये साल 3 हजार ले जादा मनोकामना ज्योत जले के उम्मीद हे। अब तक 2 हजार ले जादा भक्त मन ह ज्योति कलश बर पंजीयन करा डारे हें। खास बात ये हे कि सिर्फ बस्तर या छत्तीसगढ़ ले नहीं, बल्कि विदेश मन ले घलो माई के भक्त ऑनलाइन जुड़त हें। दुबई ले घलो भक्त मन ह वेबसाइट अउ क्यूआर कोड के मदद ले अपन नाम के ज्योत बुक कराय हें।
महंगाई के असर: बढ़ गे हे तेल-घी के सुल्क ये बार महंगाई के असर पूजा व्यवस्था ऊपर घलो दिखे बर मिलत हे। तेल अउ घी के दाम बढ़े के सेती मंदिर समिति ह सुल्क मा थोकिन बढ़ोतरी करे हे। अब तेल ज्योत बर 751 रुपिया अउ घी ज्योत बर 1751 रुपिया तय करे गे हे। जे मनखे मन ऑनलाइन बुकिंग नहीं कर पावत हें, ओ मन बर मंदिर के गेट मा ऑफलाइन काउंटर घलो बनाय गे हे ताकि कोनो ला दिक्कत झन होय।
तइयारी मा जुटे हे प्रशासन नवरात्र ला लेके मंदिर परिसर मा साफ-सफाई अउ सजावट के काम तेजी ले चलत हे। बस्तर के साथ-साथ दूसर राज्य मन ले घलो भारी संख्या मा श्रद्धालु मन के पहुंचे के उम्मीद हे। डिजिटल सुविधा होय ले इस बार माई के भक्ति के दायरा सात समंदर पार तक पहुंच गे हे।
