दर्जनों युवती मन कुंवारा मन ला बिहाव के झांसा देके लूटत रिहिन, जानव कईसे होईस पर्दाफाश

Chhattisgarh News : रायगढ़। लोक सेवा केंद्र के आड़ में चलत बड़े साइबर ठगी गिरोह के रायगढ़ पुलिस ह भंडाफोड़ करे हे। ये गिरोह ह फर्जी मैट्रिमोनियल साइट बना के शादी के नाव मं मनखे मन ले ठगी करत रिहिस। गिरोह मं कतकोन युवती मन घलो सामिल रिहिन, जउन मन ह ठगी के ये संजाल ला सुघर ढंग ले चलात रिहिन। ये बड़े कार्रवाई वरिष्ठ पुलिस अधीक्षक शशिमोहन सिंह के अगुवाई मं करे गे हे। साइबर थाना, महिला थाना अऊ स्थानीय पुलिस के संयुक्त टीम ह दरोगापारा इलाका मं बने एक ऑफिस मं छापा मारिस। जांच मं पता चलिस कि आरोपी मन पहिली लोक सेवा केंद्र के वैध काम करत रिहिन, पर लाइसेंस रद होय के बाद घलो मनखे मन ला ठगे बर अवैध धंधा चालू रखिन। ओ मन ह “इंडिया मैट्रिमोनी” नाव ले फर्जी ऑनलाइन प्लेटफॉर्म बनाइन अऊ यूट्यूब चैनल मं फर्जी फोटो-बायोडाटा डाल के लोगन ला अपन जाल मं फंसावन। अइसने होवत रिहिस ठगी ठग मन फर्जी जीमेल आईडी अऊ मोबाइल नंबर ले मनखे मन ले गोठियावत रिहिन। पहिली रजिस्ट्रेशन फीस के नाव मं यूपीआई ले पइसा मंगावत रिहिन, फेर मीटिंग अऊ रिश्ता पक्का कराय के बहाना बना के व्हाट्सएप क्यूआर कोड ले अऊ पइसा झटक लेवत रिहिन। जब पइसा मिल जाय, त “रिश्ता पसंद नई आइस” कह के मनखे मन ले नाता तोड़ देवत रिहिन अऊ नवा शिकार खोजे लग जावन। पुलिस ला मिलिस बड़े सबूत छापा मारे के बखत पुलिस ला लैपटॉप मं फोटोशॉप ले बने फर्जी दस्तावेज अऊ सरकारी विभाग मन के नकली सील-मोहर घलो मिलिस हे। पुलिस ह डिजिटल डेटा अऊ फाइल मन ला घलो जब्त कर ले हे। एक दूसर संस्था मं घलो छापा मारे गे हे, जिहां के संचालक ह ये गिरोह ले जुड़े होय के बात कबूले हे। सावधान रहय के अपील एसएसपी शशिमोहन सिंह ह कहिन कि ये एक बड़े संगठित गिरोह आय अऊ एमां अउ कतकोन झन के सामिल होय के आशंका हे। ओ मन ह आम जनता ले अपील करे हें कि ऑनलाइन शादी वाले साइट अऊ सोशल मीडिया प्रोफाइल के झांसा मं झन आवं अऊ कोनो घलो संदिग्ध काम दिखे ले तुरंते पुलिस ला जानकारी देवं।