भूमिहीन खेतीहर मजदूर मन बर खुसखबरी, CM साय काली देहीं 500 करोड़ रूपिया के सौगात
CM Vishnu Deo Sai : रायपुर। छत्तीसगढ़ सरकार ह राज्य के भूमिहीन खेतीहर मजदूर परिवार मन ल आर्थिक रूप ले मजबूत बनाय बर ‘दीनदयाल उपाध्याय भूमिहीन कृषि मजदूर कल्याण योजना’ सुरू करे हे। ए योजना के असल उदेस्य गांव-देहात के मजदूर मन ल ताकतवर बनाना आय। ए योजना मा सबले जादा रायपुर जिला के 53 हजार 338 मजदूर अऊ सबले कम बीजापुर जिला के 1542 मजदूर सामिल हें। सरकार ह ए मन ल मुख्यधारा ले जोड़ के ये संदेस दे हे कि ‘अंत्योदय’ के कतार मा ठाढ़े आखिरी मनखे घलो सरकार के प्राथमिकता मा सबले ऊपर हे।
दीनदयाल उपाध्याय भूमिहीन कृषि मजदूर कल्याण योजना के तहत 4.95 लाख ले जादा पात्र परिवार मन बर राज्य सरकार डाहर ले 495 करोड़ 96 लाख 50 हजार रूपिया के प्रावधान करे गे हे। मजदूर मन ल हर बछर 10 हजार रूपिया के आर्थिक मदद सीधा ओखरे बैंक खाता मा दे जाथे। 25 मार्च 2026 के जब बलौदाबाजार ले मुख्यमंत्री विष्णुदेव साय ए रासी ल ट्रांसफर करही, त ओहा छत्तीसगढ़ के न्याय अऊ सुशासन के गूंज होही।
मजदूर मन ल अब हर बछर मिलही 10,000 रूपिया मुख्यमंत्री साय ह कहिन कि ए योजना के पीछे हमर उदेस्य मजदूर परिवार मन के कमाई ल बढ़ाके ओमन ल संबल देना हे। ए योजना मा खेतीहर मजदूर मन के संग वनोपज बिने वाला भूमिहीन परिवार, चरवाहा, बढ़ई, लोहार, मोची, नाई, धोबी जइसन पौनी-पसारी व्यवस्था ले जुड़े परिवार मन ल घलो सामिल करे गे हे।
एखर अलावा अनुसूचित क्षेत्र मा देवस्थल मा पूजा करे वाला पुजारी, बैगा, गुनिया अऊ मांझी परिवार मन ल घलो योजना के लाभ मिलही। लाभार्थी सूची मा 22,028 बैगा अऊ गुनिया परिवार सामिल हें। सरकार ह पहिली मिले वाला 7,000 रूपिया के रासी ल बढ़ाके अब 10,000 रूपिया कर दे हे, जेकर ले मजदूर मन अपन जरूरत जइसन कि पढ़ाई-लिखाई अऊ दवाई-पानी ल बिना कोनो करजा के पूरा कर सकहीं।
कउन जिला मा कतका ल मिलही लाभ:
-
रायपुर जिला: 53,338 मजदूर
-
बिलासपुर जिला: 39,401 मजदूर
-
महासमुंद जिला: 37,011 मजदूर
-
बीजापुर जिला: 1,542 मजदूर (सबले कम)
-
कोरिया जिला: 1,549 मजदूर
-
नारायणपुर जिला: 1,805 मजदूर
