सीएम हेल्पलाइन 1076 सुरु: अब एक काल मां सुने जाही जनता के जम्मो समस्या
CM Helpline 1076 : रायपुर। मुख्यमंत्री विष्णु देव साय ह आज मंत्रालय महानदी भवन मां राज्य के बहुप्रतीक्षित ‘सीएम हेल्पलाइन 1076’ के बटन दबाके शुभारंभ करिन. ए मउका मां ओमन सीएम हेल्पलाइन के आधिकारिक लोगो घलो जारी करिन अउ हेल्पलाइन के काम-काज, तकनीकी व्यवस्था अउ शिकायत निवारण तंत्र के जायजा लीन. कार्यक्रम मां मंत्रिपरिषद के सदस्य अउ बड़के प्रशासनिक अधिकारी मन उपस्थित रहिन.
सुशासन तिहार ले मिलीस नवा व्यवस्था के प्रेरणा मुख्यमंत्री साय ह कहिन कि राज्य सरकार के साफ संकलप हे कि प्रदेश के हर एक नागरिक के समस्या सुने जाय, ओकर समे म निदान करे जाय अउ शासन-प्रशासन ला अउ जादा जवाबदेह बनाये जाय. ओमन कहिन कि सुशासन तिहार के बेरा मां पूरा प्रदेश ले मिले शिकायत, सुझॉव अउ जनप्रतिसाद ह एक मजबूत अउ स्थायी जनसंपर्क तंत्र के जरूरत ला बताइस. एच्चे सोच के संग सीएम हेल्पलाइन प्रणाली ला तैयार करे गे हे.
1076 मां दरज होही शिकायत, सुझॉव अउ फीडबैक मुख्यमंत्री ह कहिन कि अब प्रदेश के लोगन मन टोल फ्री नंबर 1076 मां अपन शिकायत दरज करवा सकिहें, सुझॉव दे सकिहें अउ सरकार के योजना अउ सेवा मन के बारे मां फीडबैक घलो बांट सकिहें. ये ब्यवस्था सुशासन, पारदर्शिता अउ जवाबदेही ला नवा मजबूती देवाय के संग-संग जनता अउ सरकार के बीच बिसवास के रिसता ला अउ मजबूत करही.
व्हाट्सऐप ले घलो जुड़िस हेल्पलाइन, 42 विभाग होही कनेक्ट मुख्यमंत्री साय ह बताइन कि डिजिटल जुग के जरूरत ला देखत हुए हेल्पलाइन ला व्हाट्सऐप ले घलो जोड़े गे हे, जेकर ले नागरिक मन मोबाइल के माध्यम ले आसानी से अपन बात सरकार तक पहुंचा सकिहें. ओमन कहिन कि ये ब्यवस्था अपन बड़े दायरा के सेती खास हे. एमॉ राज्य सरकार के 42 विभाग के लगभग 8 हजार अधिकारी जुड़े हें अउ 1195 श्रेणी मां तय समे के भीतर शिकायत मन के निपटारा के ब्यवस्था करे गे हे.
हर शिकायत ला मिलही यूनिक आईडी, समाधान ले असंतोष होय मां फिर होही जांच ओमन बताइन कि हर एक शिकायत ला एक यूनिक आईडी दिये जाही, जेकर ले आवेदक अपन आवेदन के इसथिति ला ऑनलाइन देख सकही. यदि कोनो शिकायतकर्ता ला मिले समाधान ले संतोस नहीं होही, त संबंधित शिकायत ह अपन आप बड़े अधिकारी मन करा फिर ले जांच बर चले जाही. जेकर ले शिकायत मन के ऊपरी-ऊपरी निपटारा के संभॉवना खतम हो जाही अउ जवाबदेही तय होही.
24 घंटा चलही सेवा, सचिव स्तर मां होही निगरानी मुख्यमंत्री ह कहिन कि सीएम हेल्पलाइन प्रणाली 24 घंटा अउ हफ्ता के सातो दिन चालू रहिही. एकर संचालन बर तीन शिफ्ट मां कर्मचारी मन के ड्युटी लगाये गे हे. सचिव स्तर के अधिकारी डैशबोर्ड के माध्यम ले एकर रोज निगरानी करिहें, उहें मुख्यमंत्री सचिवालय घलो एकर लगातार मॉनिटरिंग करही.
जनभागीदारी बढ़ाए के घलो बनही मंच मुख्यमंत्री साय ह कहिन कि सीएम हेल्पलाइन सिरिफ शिकायत दूर करे के माध्यम नो हे, बल्कि जनभागीदारी ला मजबूत बनाये के घलो एक बड़े मंच ए. प्रदेशवासी राज्य के बिकास ले जुड़े अपन सुझॉव घलो ए मंच के माध्यम ले दे सकिहें, जेकर ले नीति बनाये अउ योजना मन ला बने ढंग ले लागू करे मां मदद मिलही.
‘नागरिक देवो भव:’ के भावना ला मिलही बल ओमन कहिन कि प्रधानमंत्री नरेंद्र मोदी के “नागरिक देवो भव:” के मंत्र ला मानत हुए राज्य सरकार डिजिटल गवर्नेंस ला लगातार मजबूत बनावत हे. सीएम हेल्पलाइन शासन अउ जनता के बीच गोठ-बात ला अउ जादा असरदार बनाही अउ समस्या मन के तुरते समाधान मां बड़े भूमिका निभाही.
राहुल भगत ह देखाइन कार्यप्रणाली कार्यक्रम मां मुख्यमंत्री के सचिव अउ सचिव, सुशासन एवं अभिसरण विभाग राहुल भगत ह पावरपॉइंट प्रेजेंटेशन के माध्यम ले सीएम हेल्पलाइन प्रणाली के काम, उद्देस्य अउ बिसेषता मन के बिस्तार ले जानकारी दिन.
सीएम ह रायपुर के पूना राम ठाकरे ले करिन सीधा गोठ-बात मुख्यमंत्री विष्णुदेव साय ह शुभारंभ के बाद ब्यवस्था मन के निरीक्षण करिन. ओमन अधिकारी मन ला नागरिक मन ला तय समे मां बने सेवा देवाय के निरदेस दिन. निरीक्षण के बेरा मां मुख्यमंत्री ह हेल्पलाइन मां काल करने वाला रायपुर के रहइया पूना राम ठाकरे ले सीधा गोठ-बात करिन. ठाकरे ह आय प्रमाण पत्र ले जुड़े शिकायत दरज कराय के जानकारी दिन, जेकर पर मुख्यमंत्री ह जल्दी समाधान के भरोसा दिलाइन.
मंत्रिमंडल के सदस्य मन घलो करिन बात मुख्यमंत्री अउ मंत्रिमंडल के सदस्य मन ह हेल्पलाइन के माध्यम ले जुड़े हितग्राही मन ले घलो बात करिन अउ ओकर समस्या अउ सुझॉव ला सुनिन. मुख्यमंत्री ह शिकायत मन के तुरते निपटारा, पारदर्शिता अउ जवाबदेही पर बिसेष जोर देवत कहिन कि हर एक नागरिक के समस्या के बने समाधान सरकार के पहिली प्राथमिकता ए.
अधिकारी मन बताइन कि मुख्यमंत्री हेल्पलाइन मां 1200 ले जादा शिकायत श्रेणी अउ लगभग 8 हजार अधिकारी चार प्रशासनिक स्तर पर जुड़े हें. ब्लॉक ले लेके राज्य स्तर तक बहु-स्तरीय प्रणाली के जरिया शिकायत मन के निगरानी अउ समाधान करे जाही.
सीएम ह हेल्पलाइन चलाय वाला युवा मन ले घलो करिन मुलाकात मुख्यमंत्री ह हेल्पलाइन संचालन मां लगे युवा मन ले घलो मुलाकात करिन अउ ओकर काम के तारीफ करिन. ए बेरा मां ओमन ला एमआईएस डैशबोर्ड, शिकायत विश्लेषण प्रणाली अउ विभागीय प्रदर्शन मूल्यांकन तंत्र के जानकारी घलो दिये गिस. मुख्यमंत्री ह डेटा आधारित निरनय प्रक्रिया ला सुशासन के जरूरी अधार बतावत हुए शिकायत मन के बिस्लेषण के अधार पर ब्यवस्था मां सुधार के निरदेस दिन.
ए मउका मां उपमुख्यमंत्री अरुण साव अउ विजय शर्मा, कृषि मंत्री रामविचार नेताम, खाद्य मंत्री दयाल दास बघेल, राजस्व मंत्री टंकराम वर्मा, कौशल विकास एवं तकनीकी शिक्षा मंत्री गुरु खुशवंत साहेब, मुख्य सचिव विकासशील, मुख्यमंत्री के प्रमुख सचिव सुबोध सिंह, सचिव पी. दयानंद, सचिव राहुल भगत, विशेष सचिव रजत बंसल संग आन अधिकारी मन उपस्थित रहिन.
