रायपुर में बच्चा चोरी के अफवाह ले बवाल : खम्हारडीह में महिला ल भीड़ ह घेर के पीटिस, पुलिस ह अस्पताल में कराइस भरती

Raipur News : रायपुर : राजधानी के खम्हारडीह थाना इलाका के पार्वती नगर में सोमवार के बिहनिया गजब सनसनी फैल गे। बच्चा चोरी के संसो (शक) में भीड़ ह एक झन महिला ल घेरिके ओकर जमके कुटाई कर दीस। बिहनिया करीब 4:30 बजे के ए घटना ले पूरा इलाका में तनाव के माहौल बन गे हे।

Raipur News : बिहनिया ले ‘बच्चा चोर’ के सोर अउ हंगामा
मिले जानकारी के मुताबिक, पार्वती नगर के मनखे मन एक अज्ञात महिला ल संकाहा हालत में घूमते देखिन। मोहल्ला के लोगन मन के आरोप हे कि महिला ह एक घर ले लइका ल उठाके ले जाय के फिराक में रिहिस। जइसने ए बात मोहल्ला में फैलिस, लोगन मन के भीड़ जुट गे अउ महिला ल रंगे हाथ धरे के दावा करत ओकर मार-पिटाई सुरू कर दिन। देखते-देखत भारी भीड़ जमा हो गे अउ ओती-एती भगदड़ मच गे।

पुलिस के समय में एंट्री अउ जांच
घटना के खबर मिलते साठ खम्हारडीह थाना पुलिस ह तुरंते मौका में पहुँचिस अउ भीड़ के चंगुल ले महिला ल छुड़ाइस। मारपीट में घायल महिला ल इलाज बर अस्पताल में भरती कराए गे हे। पुलिस अब ए बात के जांच करत हे कि का सच में बच्चा चोरी के कोसिस होय रिहिस या फेर ए कोनो गलतफहमी अउ अफवाह आय।

अफवाह ले बचे के अपील
पुलिस ह लोगन मन ले अपील करे हे कि कोनो घलो कानून ल अपन हाथ में झन लेवें। कोनो घलो संकाहा मनखे दिखे त ओकर सूचना सीधे पुलिस ल देवें। अभी इलाका में सांति बनाए बर पुलिस बल तैनात करे गे हे अउ सीसीटीवी फुटेज के जांच करे जावत हे।