छत्तीसगढ़ ले राज्यसभा बर मार्च म चुनाव : एक सीट भाजपा अऊ एक कांग्रेस के झोली म; जानव कउन हे दावेदार
रायपुर। छत्तीसगढ़ म मार्च के महीना म राज्यसभा के दू नवा सांसद मिलही। भारत निर्वाचन आयोग ह 10 राज्य मन के 37 सीट बर चुनाई के तारीख मन के घोषणा कर दे हे। छत्तीसगढ़ ले केटीएस तुलसी अऊ फूलोदेवी नेताम के कार्यकाल अप्रैल 2026 म खत्म होवत हे, जेखर सेती ये दू सीट बर वोट डारी जाही।
विधानसभा म सीट मन के समीकरण ला देखव त ये बखत एक सीट भाजपा अऊ एक सीट कांग्रेस के खाता म जावत दिखत हे। पिछला बेर भाजपा करा सिरिफ 15 विधायक रहिन, त दूनों सीट कांग्रेस ला मिल गे रहिस। फेर अभी भाजपा करा 54 अऊ कांग्रेस करा 35 विधायक हें, एखर सेती भाजपा के एक सीट म वापसी तय हे।
दावेदार मन के गोठ करबो त कांग्रेस म नेता प्रतिपक्ष चरणदास महंत के नाम सबले आगू चलत हे। महंत जी ह कतको बेर सार्वजनिक रूप ले कह चुके हें कि ओखर इच्छा एक बार राज्यसभा जाय के हे। ओती भाजपा कोती ले अभी कोनो नाम खुल के आगू नई आए हे, फेर चर्चा हे कि कोनो ओबीसी नेता, पूर्व विधायक या फेर एससी वर्ग ले कोनो नवा चेहरा ला मौका मिल सकथे।
चुनाई के पूरा कार्यक्रम: निर्वाचन आयोग के मुताबिक, 26 फरवरी के अधिसूचना जारी होही। नामांकन भरे के आखिरी तारीख 5 मार्च हे। अगर एक-एक प्रत्याशी ही मैदान म रहिन त 6 मार्च के ही नाम फाइनल हो जाही। फेर यदि एक ले जादा उम्मीदवार होइन, त 16 मार्च के बिहनिया 9 बजे ले संझा 4 बजे तक वोटिंग होही अऊ ओही दिन संझा 5 बजे नतीजा घलो आ जाही। आयोग ह 20 मार्च तक पूरा प्रक्रिया ला खत्म करे के लक्ष्य रखे हे।
