Chhattisgarh News : खरीफ सीजन सुरू होए के पहिली जिला के किसान मन बर एक बड़का राहत भरी खबर निकल के आगू आई हे। सहकारी समिति मन ले मिलने वाला फसल ऋण (कर्जा) के नियम म बड़ बदलाव करे गे हे। अब किसान मन ला 70 प्रतिसत तक नगद रासि दिय़ा जाही। पहिली ये सीमा 60 प्रतिसत तक रिहिस, जेला अब बढ़ा दे गे हे। ओखरे संग खाद अउ बीज के रूप म मिलने वाला हिस्सा ला 40 प्रतिसत ले घटा के अब 30 प्रतिसत कर दे गे हे।

राजनांदगांव जिला म पंजीकृत किसान मन ला हर बछर खरीफ अउ रबी सीजन बर ऋण बांटे जाथे। समय म कर्जा पटाए म किसान मन ला ब्याज म घलो छूट मिलथे। ए पईत नगद हिस्सा म बढ़ोत्तरी होए ले किसान मन ला खेती-खखार के दूसर खरचा बर जादा पईसा हाथ म मिलही।

सहकारी बैंक के बताय मुताबिक, किसान मन अब अपन जरूरत के हिसाब ले 70 प्रतिसत तक नगद पईसा ले सकही, जेकर से खेती किसानी के काम म आसानी होही। पहिली नगद के सीमा कम होए ले बहुत कन किसान मन ला दिक्कत होवत रिहिस।

ऋण वितरण के लक्ष्य अउ प्रगति जिला म बछर 2025-26 बर अल्पकालीन कृषि ऋण के तहत 22,598 किसान मन ला 9,000 लाख रुपिया बांटे के लक्ष्य रखे गे रिहिस। एमा ले अभी तक 5,333.68 लाख रुपिया के ऋण बांट दे गे हे, जो कि लक्ष्य के लगभग 59 प्रतिसत आय।