छत्तीसगढ़ मा Gen-Z ला साधे बर स्कूल-कॉलेज पहुँचीस भाजपा-कांग्रेस
Chhattisgarh Gen Z Politics : रायपुर। जंतर-मंतर के प्रदर्शन के बाद राजनीति के हवा-बयार बदल गे हे। छत्तीसगढ़ में जेन-जी (नवा पीढ़ी के युवा मन) के बढ़त असर ला देख के भाजपा अउ कांग्रेस दुनो ह अपन रणनीति बदल दे हवयं। प्रदेश के करीब 1.36 करोड़ लइका अउ युवा मन तक पहुँचे बर अब स्कूल, कॉलेज, कोचिंग सेंटर अउ सोशल मीडिया ला नवा सियासी मैदान बनाए जात हे।
छत्तीसगढ़ के आर्थिक सर्वेक्षण रिपोर्ट के मुताबिक, प्रदेश में 15 ले 29 साल के लगभग 81.89 लाख युवा अउ 10 ले 19 साल के 54.59 लाख लइका हवयं। आने वाला चुनाव में ए नवा पीढ़ी के वोट बहुत मायने रखही, एखरे सेती दुनो राजनीतिक दल मन अब ‘स्कूल-कॉलेज चलो’ अभियान चालू कर दे हवयं।
अब बड़े-बड़े भाषण अउ रैलियाँ के जगह लाइब्रेरी, कोचिंग सेंटर, जिम अउ कॉफी कैफे मन राजनीति के नवा गढ़ बनत हवयं। युवा मन ला लंबी-चौड़ी बात पसंद नई आवै, ओमन ला रोजगार, पेपर लीक, स्टार्टअप अउ टेक्नोलॉजी जइसे मुद्दा मन मा सीधा जवाब अउ काम के नतीजा चाही।
ए रणनीति ला साधे बर भाजपा अपन युवा मोर्चा ला आगू करे हे अउ ‘जॉइन भाजयुमो 2026’ अभियान के जरिए बस्तर ले कॉलेज अउ यूनिवर्सिटी मन मा युवा मन ला जोड़त हे। ओन्हेच कांग्रेस घलो अपन सोशल मीडिया टीम ला नवा सिरे ले तैयार करत हे अउ युवा कांग्रेस चुनाव के माध्यम ले स्कूल-कॉलेज के युवा मन ला संगे-संग जोड़े मा लगे हे।
