मुनगा ले कुपोषण भगाही सरकार: घर-घर मुनगा- हर-घर मुनगा के नारा संग छत्तीसगढ़ म नवा अभियान शुरू

chhattisgarh news : रायपुर। छत्तीसगढ़ म कुपोषण दूर भगाए के नवा उपाय खोज ले गए हे। सरकार अब मुनगा यानी सहजन के भरोसा सुपोषण के सुग्घर सपना देखत हे। महिला अउ बाल विकास मंत्री लक्ष्मी राजवाड़े ह जनप्रतिनिधि मन ले अपील करे हें कि ओमन ये बरसात म बड़े पइमाना म मुनगा के रुख (पेड़) लगावंय। ये अभियान के नारा ‘घर-घर मुनगा, हर-घर मुनगा’ दिए गए हे।

महिला अउ बाल विकास विभाग ह योजना बनाए हे कि आंगनबाड़ी केंद्र मन म अउ हितग्राही मन के घर म मुनगा लगाए जाए। सरकार के मानना हे कि ये पौधा कुपोषण के खिलाफ बड़े हथियार बन सकत हे। मंत्री ह अपन चिठ्ठी म मुनगा ला ‘मदर ट्री’ बताए हे। एकर पाना अउ फल्ली म प्रोटीन, कैल्शियम, आयरन अउ कतकोन विटामिन पाए जाथे। सरकार ला भरोसा हे कि ये पौधा ह घर-घर तक पोषण पहुंचाही।

ग्राम पंचायत अउ नगरीय निकाय मन ला घलो ये अभियान ले जोड़े जात हे। पानी के सरोत मन के तीर, पंचायत भवन अउ सार्वजनिक जगह मन म मुनगा लगाए के अपील करे गए हे। सरकार के दावा हे कि मुनगा के रोज सेवन करे ले एनीमिया (रकत के कमी) जइसन बीमारी ला कम करे म मदद मिलही। मंत्री लक्ष्मी राजवाड़े ह सबो मन ले ये अभियान म बढ़-चढ़ के हिस्सा लेय के अपील करे हें, ताकि सुपोषित छत्तीसगढ़ के निरमान करे जा सके।